Entaifer la «fundaziun tetgala d'utilitad publica dal Grischun» vegn manà in fond cuminaivel. A quel fond pervegnan quels meds finanzials che vegnan deditgads a la «fundaziun tetgala d'utilitad publica dal Grischun» senza ch'els vegnian deditgads spezialmain ad in fond.
Il fond cuminaivel promova projects cuminaivels cunzunt aregzard u en connex cun ina relaziun cun il chantun Grischun ed a favur da sia populaziun, per exempel en ils secturs da la cultura, dal sport, dals fatgs socials, da la furmaziun u da la sanadad.
Davart las prestaziuns or dal fond cuminaivel decida exclusivamain il cussegl da fundaziun en il rom dad in reglament da promoziun e sin ina dumonda correspundenta.
A chaschun da sia sesida dals 14 da november 2022 ha il cussegl da fundaziun decidì, ch'el na possia conceder naginas contribuziuns pli a quint dal fond cuminaivel da la Fundaziun tetgala d'utilitad publica dal Grischun, perquai ch'ils meds finanzials dal fond èn exausts.
Donaziuns voluntaras al fond cuminaivel pon vegnir deducidas da las entradas resp. dal gudogn en la dimensiun limitada da 20 % da las entradas nettas resp. dal gudogn net (art. 36 lit. i ed art. 81 al. 1 lit. g LT).
Donaziuns pon vegnir fatgas da tut temp sin il conto current da la fundaziun tetgala d'utilitad publica dal Grischun tar la banca chantunala grischuna a Cuira (conto IBAN nr. CH7500774010308923300, BC nr. 774).
Ultra da donaziuns vegnan transferidas al fond cuminaivel er las fundaziuns dependentas che vegnan administradas dal chantun (fonds, legats e relaschs) e che disponan da mo pli paucs meds finanzials (art. 23 al. 3 LFC, DG 710.100).
Medemamain en il fond cuminaivel van las iertas tenor l'art. 67 al. 1 LItCCS (DG 210.100). La vischnanca da domicil po appurtar sia part vi da las iertas tenor l'art. 466 CCS medemamain en il fond cuminaivel. En mintga cas ston ils meds finanzials or d'iertas tenor l'art. 466 CCS vegnir utilisads per intents d'utilitad publica (art. 67 al. 3 LItCCS).
Ulteriuras infurmaziuns chattais Vus en il reglament da gestiun.