Tenor l'art. 83b al. 3 CCS èn las fundaziuns obligadas da far ina revisiun ordinaria u limitada. Sch'i n'existan naginas autras prescripziuns, èn applitgablas correspundentamain las prescripziuns dal dretg d'obligaziuns davart il post da revisiun da societads anonimas. Ils posts da revisiun ston ademplir da lur vart las pretensiuns qualitativas da la lescha davart la surveglianza da la revisiun (CS 221.302; abreviaziun LSR) e da lur disposiziuns executivas (CS 221.302.3; abreviaziun OSR). Ils posts da revisiun ston vegnir admess da l'autoritad federala da surveglianza en chaussas da revisiun.

La lescha davart la surveglianza da la revisiun gida ils servetschs da revisiun ad ademplir en urden lur incumbensas sco er a segirar lur qualitad e regla l'admissiun e la surveglianza da persunas che furneschan servetschs da revisiun prescrits da la lescha.

L'admissiun tras l'autoritad federala da surveglianza en chaussas da revisiun tenor la OSR è senza excepziun la premissa per far revisiuns da fundaziuns.

Sco post da revisiun è designà «Marthaler Treuhand + Revisionen» (CHE-112.434.765), Gäuggelistrasse 20, 7002 Cuira.

La «fundaziun tetgala d'utilitad publica dal Grischun» è suttamessa ad ina revisiun limitada en il senn dals art. 729 ss. DO.