La promoziun da la sanadad è dapi l'onn 2004 in element dal management da sanadad da l'administraziun chantunala. Sco patrun è il chantun Grischun obligà da proteger l'integritad fisica e psichica da sias collavuraturas e da ses collavuraturs. Per ademplir questa obligaziun en moda professiunala ha l'Uffizi da persunal endrizzà – en collavuraziun cun ils Servetschs psichiatrics dal Grischun (SPGR) – il Post anonim da cussegliaziun psicologica. El stat a disposiziun a las collavuraturas ed als collavuraturs dal chantun Grischun.
Il Post da cussegliaziun psicologica ha in team da psicologas e psicologs cun experientscha. Il team da cussegliaziun dals SPGR è cuntanschibel sut l'adressa dad e-mail PBS-Kanton@pdgr.ch u sut il numer da telefon 058 225 21 05.
Cuntrari ad in'annunzia ad ina persuna superiura u ad in'annunzia al Post per l'annunzia d'incunvegnientschas en il sectur dal persunal, n'activescha ina cussegliaziun confidenziala nagina procedura formala.
Custs e confidenzialitad
Las collavuraturas ed ils collavuraturs dal chantun Grischun pon trair a niz la purschida da cussegliaziun gratuitamain ed en moda confidenziala, q.v.d. senza che las persunas superiuras u l'Uffizi da persunal vegnan infurmads.
Las psicologas ed ils psicologs dal team da cussegliaziun èn suttamess a l'obligaziun da discreziun per tut quai che als vegn confidà cun pratitgar lur professiun. Mo sche la persuna che tschertga cussegl dat ses consentiment, inizieschan els mesiras u consulteschan els terzas persunas, nun ch'i dettia in suspect che la persuna pericliteschia sasezza u autras persunas.
Temas pussaivels d'ina cussegliaziun
Sin giavisch da las collavuraturas e dals collavuraturs cusseglia il Post anonim da cussegliaziun psicologica davart ils suandants temas:
- Mobing
- Discriminaziun
- Mulestas sexualas
- Violenza
- Problems da dependenza
- Grevezzas psichicas pervia da la lavur (sco p.ex. burnout, schliaziun da conflicts cun collavuraturas e collavuraturs, cun superiuras e superiurs u en il team)
Las psicologas ed ils psicologs dal team da cussegliaziun discutan il problem concret cun la persuna che tschertga cussegl. Ensemen cun la persuna che tschertga cussegl sviluppan els vias per schliar il conflict e la sustegnan da schliar il problem. Per mintga cussegliaziun stattan per regla a disposiziun fin 10 sesidas (exceptadas da questa limitaziun èn cussegliaziuns en connex cun mulestas sexualas).
Persunas da confidenza en cas da mulestas sexualas, discriminaziun e mobing
Tschertas psicologas e tscherts psicologs entaifer il team da cussegliaziun èn designads sco «persunas da confidenza». Las persunas da confidenza èn spezialisadas sin ils temas da mulestas sexualas, tut ils tips da discriminaziun e mobing.
Ultra dals princips generals gia numnads (gratuit, confidenzial, sustegn per schliar il problem) adempleschan las persunas da confidenza las suandantas incumbensas:
- Porscher sustegn per eruir la situaziun (Per tge vai?).
- Gidar ad elavurar ina survista da l'eveniment resp. dals eveniments.
- Cussegliar collavuraturas e collavuraturs pertutgads, sin lur giavisch er persunas ch'enconuschan la situaziun e persunas superiuras, davart opziuns d'agir pussaivlas (sviluppar strategias e soluziuns, mussar opziuns e purschidas da sustegn, infurmar davart consequenzas).
- Explitgar la situaziun giuridica e/u renviar a posts da consultaziun giuridica specifica.
- Accumpagnar il proceder tschernì.
La consultaziun d'ina persuna da confidenza n'activescha nagina procedura formala. Las persunas da confidenza pon dentant gidar las collavuraturas ed ils collavuraturs pertutgads ad instradar ina procedura formala, saja quai tras in'annunzia al Post per l'annunzia d'incunvegnientschas en il sectur dal persunal ubain a la persuna superiura.
Las collavuraturas ed ils collavuraturs da lingua rumantscha e taliana pon vegnir intermediads a persunas spezialisadas correspundentas entaifer il team, quai cun integraziun da la persuna da confidenza.