Il chantun Grischun dat gronda paisa ad ina cultura d'interpresa che sa basa sin confidenza e respect. L'integritad persunala e dal manaschi duai vegnir protegida, incunvegnientschas entaifer l'administraziun chantunala dal Grischun, tar las dretgiras e tar ils instituts chantunals autonoms duain vegnir reveladas. Per quest intent ha il chantun stgaffì l'onn 2023 in Post per l'annunzia d'incunvegnientschas en il sectur dal persunal ch'è extern ed independent da l'administraziun.
Las persunas che fan sinceramain ed en buna fai in'annunzia, èn protegidas cunter eventualas discriminaziuns. Latiers tutgan la disditga, la degradaziun en l'ierarchia ed ulteriurs obstachels per la carriera. Il Post d'annunzia na dastga però betg vegnir utilisà per far faussas inculpaziuns. Igl è scumandà d'annunziar sapientivamain faussas infurmaziuns.
Sa chapescha che las collavuraturas ed ils collavuraturs pon sa drizzar a lur persunas superiuras, sch'els han indizis concrets per incunvegnientschas. Sche las incunvegnientschas na vegnan betg eliminadas, suenter ch'ellas èn vegnidas tematisadas internamain, u sch'i resultan conflicts d'interess, poi e duai vegnir fatg in'annunzia al Post independent per l'annunzia d'incunvegnientschas.
Cuntrari ad ina cussegliaziun confidenziala tar il Post da cussegliaziun psicologica, activescha in'annunzia al Post per l'annunzia d'incunvegnientschas en il sectur dal persunal u in'annunzia ad ina persuna superiura ina procedura formala.
Fegl sgulant e fegl d'infurmaziun
Temas d'ina annunzia
Al Post d'annunzia independent pon las collavuraturas ed ils collavuraturs annunziar incunvegnientschas al plaz da lavur u en il manaschi – quai, sch'i vegn giavischà, er en furma anonima.
Incunvegnientschas èn per exempel:
- Violaziuns da l'integritad corporala e psichica tras discriminaziun, mobing, mulestas sexualas, violenza u autras violaziuns da la persunalitad.
- Violaziuns da l'integritad dal manaschi tras engion, corrupziun, defraudaziun u ulteriurs fauss cumportaments finanzials.
- Cuntravenziuns cunter obligaziuns da servetsch, sco l'obligaziun da fidaivladad, l'obligaziun da discreziun, l'obligaziun da prender recusaziun, il scumond d'acceptar regals, u cuntravenziuns cunter prescripziuns da la protecziun da datas, da la protecziun da l'ambient u da la segirezza al plaz da lavur.
Per far in'annunzia ston esser avant maun observaziuns ed infurmaziuns concretas. Ina fama u sulettamain ina supposiziun na tanschan betg sco basa per in'annunzia. Per elavurar l'annunzia èsi impurtant che l'incunvegnientscha u il fauss cumportament vegnia descrit detagliadamain e precisamain. Quai vala en spezial per annunzias anonimas.
Persunas cun dretg d'annunzia
Annunziar incunvegnientschas pon las persunas che lavuran actualmain tar l'administraziun chantunala, tar las dretgiras u tar ils instituts chantunals autonoms (excepziun: Banca Chantunala Grischuna).
Direcziun dal Post d'annunzia
La firma IntegrityPlus SA, Turitg, maina il Post per l'annunzia d'incunvegnientschas en il sectur dal persunal dal chantun Grischun.
Cuntanschibladad dal Post d'annunzia
Las annunzias duain vegnir inoltradas da preferenza via la plattafurma online. Alternativamain pon ellas er vegnir fatgas per telefon, per posta u per e-mail:
Pervia da la protecziun da datas e da la segirezza da las datas na dastgan las persunas che fan in'annunzia per e-mail betg agiuntar material da cumprova.
Activitads dal Post d'annunzia
Suenter che la firma IntegrityPlus sco Post d'annunzia ha survegnì in'annunzia, proceda ella sco suonda:
- Il Post d'annunzia infurmescha l'annunziadra u l'annunziader en moda adequata e cusseglia tala u tal (p.ex. sclerir, sche l'annunziadra u l'annunziader ha in basegn da protecziun immediat, discutar la situaziun e las opziuns d'agir sco er las mesiras recumandadas, sustegnair en moda cumpetenta, infurmar davart il stadi da la procedura).
- Il Post d'annunzia procura che las persunas involvidas vegnian protegidas cunter dischavantatgs nungiustifitgads (p.ex. mantegnair l'anonimitad da l'annunziadra u da l'annunziader e proteger la persunalitad durant l'entir process d'elavurar l'annunzia).
Particularitad concernent l'anonimitad en cas da mulestas sexualas, discriminaziun e mobing:
Igl è impurtant da proteger las persunas ch'èn pertutgadas da mulestas sexualas, discriminaziun e mobing. Perquai ch'ellas han tema da dischavantatgs, na vulan las persunas pertutgadas savens betg tradir lur identitad envers las persunas inculpadas.
A medem temp ston las persunas inculpadas dentant avair la pussaivladad da sa defender cunter faussas inculpaziuns. Sch'ellas n'enconuschan betg ils fatgs concrets, po quai esser fitg difficil. Las persunas inculpadas han perquai il dretg da vegnir a savair, tge renfatschas concretas ch'i dat cunter ellas. Uschiglio fissi pussaivel da far inculpaziuns senza motiv cun consequenzas gravantas per las persunas inculpadas.
Premess che l'annunzia da mulestas sexualas, discriminaziun u mobing na vegnia betg fatga en moda anonima, stoi perquai vegnir fatg quint, che l'identitad da l'annunziadra u da l'annunziader vegnia tradida a la persuna inculpada en il decurs da l'ulteriur scleriment.
Sch'ina annunzia vegn fatga cumplettamain en moda anonima, è l'anonimitad garantida tras il sistem. En quest cas èsi dentant difficil da sclerir conscienziusamain ils fatgs. Plinavant n'èsi strusch probabel, ch'i resultian consequenzas dal dretg da persunal per la persuna inculpada.
- En cas d'in basegn da protecziun immediat contactescha il Post d'annunzia las persunas da contact dal patrun.
- Sch'ina retschertga interna da l'eveniment para dad esser urgentamain necessaria, infurmescha il Post d'annunzia las persunas da contact dal patrun e sustegna las instanzas cumpetentas da sclerir ils fatgs e da realisar las mesiras.
- Plinavant suttametta il Post d'annunzia a la Regenza ina giada per onn in rapport davart sias activitads, per che quella saja infurmada p.ex. davart il dumber e davart il gener da las annunzias inoltradas sco er davart l'elavuraziun da talas e per ch'ella possia prender ulteriuras mesiras en cas da basegn.