A chaschun da sia sesida dals 31 d'avust 2022 ha il Cussegl federal actualisà las sancziuns en connex cun la situaziun en l'Ucraina. Vegnids concludids e mess en vigur il medem di èn er scumonds concernent la surdada d'incaricas publicas a burgaisas e burgais russ sco er ad organisaziuns u ad instituziuns ch'èn domiciliadas en Russia. Exceptads da quai èn las burgaisas ed ils burgais russ ch'èn domiciliads en Svizra sco er las interpresas svizras ch'èn en possess russ.

La sancziun cumpiglia il scumond da surdar incaricas publicas a persunas, ad interpresas ed ad organisaziuns sancziunadas, quai a partir da la limita respectiva (scumond d'agiudicaziun) e collià cun in scumond da concluder contracts. Ils contracts currents davart incaricas publicas ston vegnir terminads fin ils 28 da favrer 2023. Pertutgadas dal scumond èn las offerentas e lur subinterpresas che survegnan passa 10 % da la valur d'incarica.

Per la realisaziun vegn mess a disposiziun a las incumbensadras publicas in formular d'autodecleraziun che sto vegnir emplenì da las offerentas en la procedura da surdada.