Cun la guerra en l’Ucraina è il Grischun vegnì confruntà cun ina situaziun cumplettamain nova: Il dumber da requirents d’asil che la Confederaziun assegna al chantun è sa multiplitgà andetgamain. Entaifer curt temp  è sa furmada ina collavuraziun tranter differents posts dal chantun, da las vischnancas e la populaziun. Grazia a quella collavuraziun han ils umans cun basegn da protecziun spert chattà in nov alloschament. Quai è mo stà pussaivel cun l’avertadad e la solidaritad da la populaziun grischuna.

Famiglias ospitantas mettan a disposiziun in alloschament ad umans cun basegn da protecziun. Sco persuna ospitanta essas Vus savens l’emprima persuna da contact  per ils umans da l’Ucraina e prestais in impurtant agid d’orientaziun e savens era agid material. Nus engraziain cordialmain a las famiglias ospitantas per questa purschida solidara e generusa.

Sin questa pagina chattais Vus infurmaziuns impurtantas davart l’alloschament, l’assistenza ed il sustegn da persunas cun basegn da protecziun da l’Ucraina en il chantun Grischun.

Responsabladads

Per pudair dumagnar las sfidas en connex cun la collocaziun, cun l'assistenza e cun il sustegn da las persunas che tschertgan protecziun sco er cun l'instrucziun da lur uffants, ha la Regenza definì las cumpetenzas dals posts da servetsch chantunals:

Persunas cun basegn da protecziun en alloschaments collectivs dal chantun 

Persunas che basegnan protecziun e ch'èn collocadas en structuras collectivas chantunalas vegnan assistidas e sustegnidas tras l'Uffizi da migraziun e da dretg civil dal Grischun.
Uffants che vegnan alloschads ensemen cun lur geniturs en localitads collectivas dal chantun, vegnan scolarisads en las structuras da scola manadas per quest scopo da l’uffizi da migraziun e dretg civil.

Persunas cun basegn da protecziun en alloschaments privats e tar famiglias ospitantas 

Persunas cun il status da protecziun S:

Persunas che basegnan protecziun, cun il document «S» che han chattà in refugi tar ina famiglia ospitanta u en in'abitaziun privata, vegnan sustegnidas tras il servetsch social chantunal regiunal cumpetent en il sectur da l'agid social persunal ed economic. Il sustegn finanzial vegn prestà directamain tras il servetsch social regiunal. Uschia na resultan nagins custs supplementars per las vischnancas: Il chantun surpiglia ils custs per la cussegliaziun sociala sco er per il sustegn finanzial da questa gruppa da persunas. 
Era famiglias ospitantas dal Grischun sa pon drizzar punctualmain al servetsch social. In accumpagnament al lieu en las famiglias ospitantas grischunas na sa actualmain betg vegnir prestà per motivs da resursas. 

Persunas senza il status da protecziun S:

Persunas senza in document «S» (visum turistic da 90 dis) ch'èn collocadas tar ina famiglia ospitanta u en in'abitaziun privata, vegnan sustegnidas tras il servetsch social chantunal regiunal cumpetent en il sectur da la cussegliaziun sociala persunala.
Ils custs per l'alloschi e per l'ulteriur sustegn finanzial van cumplainamain a quint da las persunas che basegnan protecziun respectivamain da la famiglia ospitanta privata, e quai almain fin a la concessiun dal status da protecziun «S».
Sch'i dovra tuttina in sustegn finanzial, vegn quel pajà da la vischnanca en furma da l'agid d'urgenza. Sco alternativa stattan ils centers federals d'asil a disposiziun per la dunsena e per l'alloschi.

Persunas da l’Ucraina che tschertgan protecziun san inoltrar lur dumonda per il status da protecziun S online cun l’applicaziun web RegisterMe. Las premissas èn ch’ellas avevan lur domicil en l’Ucraina enfin ils 24 da favrer 2022 e ch’ellas èn gia entradas en Svizra.
L'instrucziun d'uffants e da giuvenils che n'èn betg collocads en in alloschi collectiv dal chantun ha lieu en las vischnancas da domicil correspundentas da las persunas che tschertgan protecziun. La cumpetenza chantunala ha l'Uffizi per la scola populara ed il sport.

Las incumbensas en il sectur da la protecziun da la populaziun

Exposiziun a radioactivitad, locals da protecziun e.u.v. èn en la cumpetenza da l'Uffizi da militar e da protecziun civila (UMPC). Il UMPC sustegna plinavant ils posts da servetsch tar la coordinaziun e tar la realisaziun da mesiras. 

Ulteriuras infurmaziuns chattais Vus qua

Fianziaziun

Basa legala

La Confederaziun indemnisescha ils chantuns per ils custs che resultan da l’assistenza e l’alloschament da las persunas cun basegn da protecziun cun il status da dimora S cun la pauschala globala 1. Quella na vegn betg a cuvrir ils custs per las persunas cun basegn da protecziun cun il status da dimora S en il chantun Grischun: il chantun quinta cun custs da radund 53 milliuns francs enfin la fin dal 2022. La pauschala globala 1 da la Confederaziun cuvra probablamain 40 milliuns francs.  Ils ulteriurs 13 milliuns francs porta il chantun.
La finanziaziun da persunas cun basegn da protecziun cun il status da dimora S è reglada sin nivel chantunal. L’autezza dal sustegn vegn calculada tenor l’agid social per persunas en il sectur d’asil. Ella è pli bassa che l’agid social per la populaziun indigena u per fugitivs. Il sustegn dependa da la situaziun individuala da la persuna.

Alloschaments collectivs

Persunas cun basegn da protecziun cun il status da dimora S en alloschaments collectivs vegnan sustegnidas da l’uffizi da migraziun tenor la “Directiva e las normas d’agir per il sustegn e l’assistenza da persunas en il sectur d’asil”.

Alloschaments individuals

Il sustegn finanzial da persunas cun basegn da protecziun cun il status da dimora S en alloschaments individuals s’orientescha da principi a las directivas da la COSAS, dentant cun in basegn da basa reducì per 20%. Il sustegn finanzial vegn concedì da principi a partir da l’emprim contact cun il servetsch social regiunal, il pli baud dentant a partir da la concessiun dal status da protecziun tras il secretariat da stadi per migraziun SEM. Premissa è il mussament da la basegnusadad.
Il basegn da basa cuvra ils custs per nutriment, consum d’energia, custs da tegnairchasa, igiena dal corp, vestgadira ed ulteriuras expensas persunalas. Sche persunas cun basegn da protecziun cun il status da dimora S vivan en atgnas abitaziuns affittadas, vegn era resguardà la grondezza da las unitads da sustegn.
Plinavant vegn surpiglià sco prestaziun da sustegn maximalmain il tschains-chasa usità al lieu per ina abitaziun favuraivla per la grondezza da la chasada correspundenta incl. custs accessoris.

Persunas cun basegn da protecziun cun il status da dimora S che abitan tar persunas privatas survegnan in basegn da basa che s’orientescha ad ina cuminanza d’abitar sumeglianta ad ina famiglia. Tar in alloschament pli lung en in alloschi privat, po vegnir bunifitgà a partir da trais mais ina contribuziun a las spesas. Premissa è l’existenza d’in contract da locaziun u in contract da sutfittanza. Il servetsch social responsabel sa sustegnair en chaussa. Excepziun: l’abitaziun è vegnida intermediada dal chantun.

Ils custs per l’assicuranza da basa encunter malsogna vegnan purtads dal chantun, per regla a partir dal termin da la dumonda per il status da protecziun S.

Ulteriuras infurmaziuns chattais Vus qua 

Consequenzas fiscala tar l’alloschament da burgaisas e burgais da l’Ucraina

Passa la mesadad da las persunas fugidas da l’Ucraina ha chattà alloschament tar famiglias ospitantas. Spezialmain per las famiglias ospitantas hai dà era insaquantas dumondas fiscalas. Las respostas correspundentas a las dumondas principalas chattais Vus en la Wegleitung zur Steuererklärung 2022.

Il pli impurtant curtamain: Indemnisaziuns dal maun public u dad ulteriuras instituziuns a famiglias ospitantas per la recepziun da fugitivs n’èn betg suttamessas a la taglia sin las entradas da l’alloschader. Prestaziuns (en natiralias u en daner contant) dals alloschaders a fugitivs n’èn era betg suttamessas a la taglia da las entradas tar ils fugitivs, perquai ch’i sa tracta da prestaziuns da sustegn. Tut tenor l’autezza pon las persunas che sustegnan far valair la deducziun da sustegn.

Sch’ina segunda abitaziun u ina abitaziun integrada vegn messa a disposiziun (eventualmain parzialmain) gratuit a fugitivs, na permetta quai betg ina reducziun da la valur da l’atgna locaziun. La valur da l’atgna locaziun cumpletta è vinavant suttamessa a la taglia.
Sche la part da la valur da l’atgna locaziun da l’abitaziun messa a disposiziun cuntanscha l’autezza necessaria per la concessiun da la deducziun da sustegn, pon ins far valair la deducziun da sustegn.

Dapli infurmaziuns chattais Vus en la Wegleitung zur Steuererklärung 2022.