Elavuraziun da las cundiziuns generalas politicas
Per ch'in uffant pitschen possia sa sviluppar en moda sauna è in ambient famigliar amuraivel uschè impurtant sco purschidas che promovan la sanadad, d'auta qualitad e pajablas per tuts da la promoziun tempriva sin plaun communal e regiunal.
Cun sviluppar in concept per l'uffanza tempriva cun focus sin la promoziun da la sanadad surpiglia la vischnanca/la regiun sia responsabladad per questa fasa da vita e stgaffescha cundiziuns da crescher si che promovan la sanadad sco er bunas cundiziuns generalas per purschidas d'auta qualitad en quest sectur. Questas cundiziuns procuran per schanzas pli gistas tar l'entrada en scolina.
Avant che la vischnanca prenda la decisiun da sviluppar in concept, vegnan discutads e definids cuminaivlamain ils puncts centrals ils pli impurtants per quest intent, particularmain la situaziun da partenza communala/regiunala, l'effect giavischà sco er ina definiziun pli clera da las finamiras, da la(s) gruppa(s) en mira e dals temas. Sche quai è raschunaivel èsi pussaivel d'extender il project sin las fasas da la vita uffanza, giuventetgna e vegliadetgna.
Sa basond sin questa discussiun vegnan formuladas finamiras e deducidas mesiras en il concept da realisaziun. Ellas resultan en in plan da realisaziun che vegn sustegnì vastamain.
Il svilup dal concept sa basa sin il mussavia naziunal Primokiz (guardar ils ulteriurs links).
Gruppa/s en mira
Purtadras e purtaders da decisiuns politicas sin plaun communal u regiunale
Finamiras dal project
La vischnanca u la regiun sviluppa e franchescha cundiziuns generalas politicas ed organisatoricas per ina politica da l'uffanza tempriva activa, orientada a finamiras e concepida a lunga vista cun il focus promoziun da la sanadad, per:
- sviluppar ina chapientscha cuminaivla da la promoziun tempriva
- mantegnair u meglierar las cundiziuns da crescher ed uschia promover la sanadad dals uffants pitschens
Cuntegns da la purschida
- Cussegliaziun davart la promoziun da la sanadad durant l'uffanza tempriva
- Sustegn cun argumentaris
- Finanziaziun d'in accumpagnament da process extern (expert da Primokiz) che sustegna il svilup dal concept en la vischnanca u regiun, per maximalmain 32 uras
- Sustegn finanzial da maximalmain 10 000 francs per sviluppar il concept (max. 50 % dals custs totals)
- Access a documents e projects examinads en la pratica ed evaluads da Primokiz, in program naziunal per sviluppar ina politica cumplessiva da l'uffanza tempriva
Cundiziuns generalas
- Decisiun da princip da la politica communala u regiunala cun l'incumbensa da realisar almain in'analisa da la situaziun
- Suttascripziun d'ina cunvegna cun l'Uffizi da sanadad
- La vischnanca u regiun garantescha ina direcziun adattada dal project, ca. 10 – 20 % d'in pensum annual, e quai sur 1,5 – 2 onns
- Commembra u commember da la suprastanza communala (p.ex. l'incumbensada u l'incumbensà per la promoziun da la sanadad e per la prevenziun) represchenta la vischnanca en la gruppa directiva
- Approvaziun dal concept tras las vischnancas/la regiun ed incumbensa da realisaziun (incl. finanziaziun)
Link