Il plan da basa da la mesiraziun uffiziala (PB-MU) è in product cartografic en furma da raster che vegn generà automaticamain cun las datas da la mesiraziun uffiziala (MU). Per pudair illustrar meglier la topografia, en spezial quella en las muntognas, vegn il plan da basa cumplettà cun ina illustraziun da la grippa e da glera, cun in reliev dal terren sco er cun curvas e cotas d'autezza.

Per meglierar ulteriuramain il cuntegn infurmativ vegn il plan da basa dal chantun Grischun cumplettà supplementarmain cun objects sco schraffuras da scarpas, mirs impurtants, ovras electricas, cruschs da baselgias, santeris, frizzas en flums e.u.v. Per las lingias da viafier vegn duvrada ina signatura da viafier speziala. Empè da la rait da vias da la MU vegn duvrada la rait da vias e sendas da viandar dal model topografic da la cuntrada (MTC) da swisstopo. Pervia da questas adattaziuns vegn il product designà sco "Plan da basa da la mesiraziun uffiziala dal chantun Grischun (PB-MU-GR)".

Il PB-MU-GR datti en ina varianta da colur, en ina varianta en tuns grischs ed en ina varianta en alv e nair. Il matg ed il november vegn el mintgamai generà da nov sin fundament da las datas actualas da la MU.