Ils puncts fixs da la Svizra èn vegnids mesirads avant passa tschient onns cun ina qualitad excellenta per las pussaivladads da quella giada. Perquai che la qualitad na correspundeva betg en mintga cas a las pretensiuns d'ozendi, èn vegnidas introducidas l'onn 2016 novas coordinatas.

Areguard la qualitad e l'omogenitad geometrica pon las datas da la mesiraziun uffiziala (MU) dentant demussar localmain cuntradicziuns pli grondas u pli pitschnas, che na pon betg vegnir eliminadas cun midar il rom da referenza.

Ils motivs per las cuntradicziuns localas èn d'ina vart il svilup da la MU en etappas sco er il progress tecnic, particularmain da la tecnologia GNSS. Da l'autra vart pertutga quai er sbagls gravants betg scuverts, eventualas negligientschas d'actualisaziun e spustaments dal terren ch'èn limitads localmain e che sa chattan ordaifer ils terrens instabils gia enconuschents.

Per pudair nizzegiar ils avantatgs tecnics ed economics da la tecnologia GNSS, ston las datas da la MU vegnir deliberadas da questas cuntradicziuns localas.

Per quest intent vegnan ils puncts fixs da la MU determinads da nov e tut tenor resultat vegnan rectifitgadas las coordinatas da las ulteriuras infurmaziuns da la MU.