Abitaziuns secundaras
Agid d'execuziun chantunal
ACTUALITADS: Revisiun da la LAS «Lex Candinas» en vigur a partir dal 1. d'october 2024
Abitaziuns da dretg vegl dastgan puspè vegnir engrondidas, sch'ellas vegnan demolidas e reconstruidas
Cun la «Lex Candinas» è vegnì revedì l'art. 11 da la Lescha federala davart las abitaziuns secundaras (LAS) e mess en vigur per il 1. d'october 2024. L'art. 11 LAS regla la midada da las abitaziuns da dretg vegl concernent la construcziun e concernent l'utilisaziun. Cun resalva da disposiziuns chantunalas u communalas divergentas pon las abitaziuns da dretg vegl vegnir utilisadas libramain.
Tge sa mida?
- Abitaziuns da dretg vegl dastgan vegnir engrondidas per 30 pertschient da la surfatscha d'utilisaziun principala existenta er, sch'ellas vegnan demolidas e reconstruidas.
Fin ussa (q.v.d. dapi la sentenzia dal Tribunal federal 1C_478/2019 dals 8 da matg 2020) era quai permess mo, sch'ellas vegnivan renovadas u midadas. Autramain avess stuì vegnir imponida ina restricziun d'utilisaziun (emprima abitaziun).
- Abitaziuns da dretg vegl dastgan vegnir repartidas (splitting) en pliras abitaziuns (che pon vegnir utilisadas libramain) er, sch'ellas vegnan engrondidas per 30 pertschient.
Fin ussa eri pussaivel da reparter in'abitaziun da dretg vegl mo, sche l'abitaziun na vegniva betg engrondida. In splitting d'ina abitaziun da dretg vegl engrondida aveva per consequenza, ch'ina restricziun d'utilisaziun (emprima abitaziun) vegniva imponida a l'abitaziun che resultava da nov.
- In'abitaziun supplementara (che po vegnir utilisada libramain) e che vegn stgaffida cun reparter resp. far il splitting d'ina abitaziun da dretg vegl, dastga er resultar en in nov edifizi supplementar.
Pertutgant il lieu, nua ch'il nov edifizi sto esser situà, na datti dentant naginas infurmaziuns. L'edifizi supplementar stuess dentant vegnir construì en la vischinanza da l'abitaziun che vegn repartida, e quai da princip sin la medema parcella (analogamain al spustament dal lieu, sch'ina abitaziun da dretg vegl vegn demolida/reconstruida).
Fin ussa stueva il splitting d'ina abitaziun da dretg vegl vegnir fatg pli u main en il medem lieu, almain dentant en il medem edifizi. Autramain avess stuì vegnir imponida ina restricziun d'utilisaziun (emprima abitaziun).
- En cas d'edifizis ordaifer la zona da construcziun (EOZ) èsi permess d'engrondir l'edifizi er, sch'el vegn demolì e reconstruì, e quai danovamain – sco avant l'onn 2020 – tenor las disposiziuns da la legislaziun davart la planisaziun dal territori (LPT).
Dapi la sentenzia dal Tribunal federal dals 8 da matg 2020 (1C_478/2019) n'èn engrondiments dad EOZ da dretg vegl betg pli vegnids permess da l'Uffizi chantunal per il svilup dal territori (UST), sch'ils edifizis vegnivan demolids e reconstruids (cf. brev dal UST dals 20 d'october 2020). Resalvada è restada l'imposiziun d'ina restricziun d'utilisaziun particularmain sco emprima abitaziun, quai che n'è dentant betg pussaivel per edifizis abitads temporarmain, sco aclas.
Agid d'execuziun: Ina versiun 3 da l'agid d'execuziun è en elavuraziun. Ultra da l'integraziun da la «Lex Candinas» vegnan fatgas ulteriuras actualisaziuns.
Legislaziun federala davart abitaziuns secundaras
Disposiziuns executivas chantunalas
Regulaziuns communalas davart las abitaziuns secundaras
Charta da las vischnauncas cun ina quota d'abitaziuns secundaras sur 20%
Ordinaziun transitoria dal 1. schaner 2013 fin ils 31 da decembar 2015 (betg pli in vigur)