Emprendistas ed emprendists cun in impediment na dastgan betg vegnir dischavantagiads en la furmaziun fundamentala professiunala ed en la furmaziun professiunala correspundenta pervia da lur impediment en connex cun l'emprender, en cas d'examens en la scola professiunala spezialisada, en la procedura da qualificaziun ed en ils curs intermanaschials.

La noziun «cumpensaziun da dischavantatgs per persunas cun impediments» stat per mesiras pussaivlas che han la finamira da gulivar dischavantatgs. I sa tracta d'adattaziuns da la scolaziun e da la procedura da qualificaziun ch'èn necessarias per garantir l'egualitad da las schanzas per persunas cun impediments en la furmaziun professiunala. Tras la cumpensaziun da dischavantatgs che remplazza las facilitaziuns d'examen vegn realisada l'egualitad giuridica da persunas cun restricziuns en la furmaziun professiunala.

Las adattaziuns sa restrenschan sin ils secturs che na pon betg ademplir las restricziuns u che pon ademplir mo per part. La qualificaziun, q.v.d. las enconuschientschas e las abilitads pretendidas resp. necessarias che vegnan premessas per pratitgar ina professiun qualifitgada, na vegn betg restrenschida. I na sa tracta pia betg d'ina facilitaziun da l'examen final, mabain d'ina cumpensaziun da dischavantatgs, senza ch'il cuntegn dals criteris da qualificaziun vegnia midà.

Sch'ina emprendista u in emprendist è restrenschì pervia d'ina restricziun d'emprender ina professiun, po l'uffizi per la furmaziun professiunala – sin dumonda dal manaschi d'emprendissadi u da l'emprendista u da l'emprendist – conceder ina cumpensaziun da dischavantatgs en la scola professiunala spezialisada, en ils curs intermanaschials ed en la procedura da qualificaziun. Ina cumpensaziun da dischavantatgs vegn concedida en cas da restricziuns corporalas u da difficultads d'emprender e da prestaziun sco legastenia (flaivlezza da leger e da scriver), discalculia (flaivlezza da far quints) u in disturbi da deficit da l'attenziun (cun iperacti-vitad) AD(H)S. Cun far la dumonda stoi il medem mument vegnir examinà, sche tut las mesiras da promoziun èn exauridas. La dumonda d'ina cumpensaziun da dischavantatgs per l'examen final sto vegnir inoltrada il pli tard cun l'annunzia a l'examen e sto cuntegnair las cumprovas necessarias resp. ils attests necessaris da persunas spezialisadas (persunas d'instrucziun spezialisadas, medias e medis e.u.v.).

Tar l'annunzia