Basas
L'administraziun d'infurmaziun en l'administraziun chantunala vegn reglada decisivamain tras la Lescha davart la gestiun da documents e l'archivaziun (LGDA) dals 28.08.2015 sco er tras l'Ordinaziun respectiva (OGDA) dals 22.12.2015. Quests relaschs cuntegnan las pretensiuns envers la gestiun da documents per las autoritads e las administraziuns publicas en il chantun.
La gestiun da documents tutga dapi tschientaners inseparablamain tar l'administraziun; ella pussibilitescha segirezza giuridica sco er ina lavur fidada ed effizienta da l'administraziun. Plinavant serva ella a l'archivaziun sistematica dals documents cun valur archivarica en ils archivs cumpetents.
Dapi intgins decennis è la sfida la pli gronda il passadi dal mund dal palpiri al mund da las infurmaziuns digitalas. Las basas legalas existentas en il Grischun creeschan bunas cundiziuns generalas per la transfurmaziun digitala.
L'onn 2016 ha la Regenza grischuna concludì da sviluppar vinavant la gestiun digitala da las fatschentas applitgond il sistem CMI. Dapi lura vegn l'entira administraziun chantunala midada cuntinuadamain sin in standard unitar e modern da l'administraziun digitala d'infurmaziuns. La gestiun da documents sin palpiri vegn remplazzada pli e pli savens. Ultra da la software per l'administraziun da las fatschentas CMI vegnan duvradas numerusas applicaziuns spezialisadas, cun las qualas vegnan medemamain elavuradas fatschentas administrativas.
Er en las vischnancas grischunas vegni lavurà cun tutta forza vi da la transfurmaziun digitala. Dapi decennis dovran las vischnancas sistems digitals per la gestiun da documents. Dasperas existan però anc vinavant er archivs sin palpiri.

Projects currents
En il rom dal project «Ulteriur svilup GEVER» ha la gronda part dals posts da servetsch da l'administraziun chantunala survegnì durant ils onns 2019–2024 in sistem d'urden modern (plan da registratura). Quai è l'element central da l'administraziun d'infurmaziun. Cun quest agid pon vegnir structuradas las gruppas d'actas existentas e realisadas las reglas per l'archivaziun da mintgadi e per il deposit quotidian.
Il punct da contact tecnic per furnir documents digitals or dal CMI stat a disposiziun dapi l'onn 2021 e vegn implementà successivamain en ils uffizis chantunals.
En il rom dal project «Destraziun da GEVER» che suonda lura vegn cuntinuada la lavur prosperaivla dals onns precedents. La finamira è quella d'optimar las basas elavuradas (sistems d'urden), da scolar lur diever e da far avanzar l'administraziun digitala da l'infurmaziun. Il project è ina part dal project grond «Administraziun digitala Grischun 2024–2028».

Rolla da l'archiv dal stadi
En l'administraziun chantunala cusseglia l'Archiv dal stadi ils singuls uffizis per optimar lur administraziun d'infurmaziuns tenor las prescripziuns legalas. Medemamain prenda el la decisiun finala davart l'archivaziun u davart la destrucziun (cassaziun) dals documents dals uffizis chantunals (LGDA art. 7).
Ensemen cun la Chanzlia chantunala e cun l'Uffizi d'informatica gida e scolescha l'Archiv dal stadi – en il rom dal «Center da cumpetenza CMI» – ils uffizis chantunals a realisar la gestiun digitala da fatschentas.
L'archiv dal stadi surveglia ils archivs da las vischnancas e da las regiuns. Er qua è ina gestiun sistematica da documents la premissa per in'archivaziun sistematica. Ils projects ils pli impurtants en quest sectur èn quels, d'elavurar in model d'in sistem d'ordinaziun per las vischnancas e per las regiuns sco er da relaschar pretensiuns minimalas per l'archivaziun.