Navigation

Inhaltsbereich

Il chantun Grischun ha stgaffì in grond dumber d'architectas e d'inschigners da construcziun extraordinaris e strusch in auter chantun na dispona d'ina densitad cumparegliabla d'ina architectura d'auta qualitad. Per pussibilitar ina confruntaziun specifica cun la cultura architectonica grischuna vul il chantun endrizzar – en collavuraziun cun la citad da Cuira e cun la fundaziun «chastè da Haldenstein» en il chastè da Haldenstein – in «archiv da la cultura architectonica» che duai vegnir manà sco archiv spezial da l'archiv dal stadi dal Grischun.
L'archiv da la cultura architectonica duai surpigliar il relasch da biros d'architectura e d'inschigneria impurtants e la preparar tenor standards archivics. Latiers tutgan plans, models d'ovras, documentaziuns fotograficas, documents da fatschenta ed ulteriuras materialias relevantas che pussibiliteschan in'analisa profunda da process da construcziun, davent da la planisaziun fin a l'edifizi terminà, ma che tegnan er chapaivla la vart economica dal construir. Ultra da las incumbensas classicas d'in archiv duai l'archiv da la cultura architectonica s'occupar en moda proactiva da la valurisaziun dals effectivs per la scienza, per la furmaziun e per la pratica architectonica, organisond lavuratoris, seminaris e dietas. Ultra da quai duain las materialias da l'archiv da la cultura architectonica – sur exposiziuns e sur occurrenzas – er far effect en la publicitad e dar stausch supplementar al turissem ch'è interessà a l'architectura.
Sco emprim inventari impurtant duain ils documents da l'atelier da Peter Zumthor en l'archiv da la cultura architectonica vegnir elavurads en moda cumplessiva e valurisads. Plinavant stattan a disposiziun a l'archiv da la cultura architectonica er ils relaschs da biros d'architectura e d'inschigneria ch'èn gia archivads en l'archiv dal stadi dal Grischun. Sco lieu è previs il chastè da Haldenstein.
La promoziun da la cultura architectonica è ina finamira essenziala da la politica da la cultura da construcziun svizra che chapescha la cultura da construcziun sco part integrala dal svilup dal territori e da la furmaziun da l'identitad. L'archiv da la cultura architectonica grischuna duai prestar ina contribuziun impurtanta per realisar questa finamira naziunala, quai cun promover activamain la documentaziun, la perscrutaziun e l'intermediaziun da la cultura da construcziun regiunala.