Per entrar en la 3. classa dal gimnasi ed en la 1. classa da la SMC, SMI u SMS absolvan las candidatas ed ils candidats l'examen unifitgà.

Infurmaziuns generalas examen unifitgà

Admissiun

A l'examen unifitgà vegnan admess mo scolaras e scolars da la 2. u 3. classa dal stgalim secundar I, dals quals almain in genitur ha ses domicil civil en il chantun Grischun.

L'admissiun suenter il temp da scola obligatoric è pussaivla fin e cun l'onn chalendar che las candidatas ed ils candidats cuntanschan la maiorennitad (premess che almain in genitur haja ses domicil civil en il chantun Grischun).

L’admissiun a l’examen or da l’emprima classa dal stgalim secundar I è exclus. Excepziuns n’èn damai betg pussaivlas.

Roms d’examen

• Eprima lingua* (tudestg, rumantsch u talian): 90 minutas examen en scrit
• Englais
  1. Part: 15 minutas chapientscha da tadlar
  2. Part: 60 minutas examen en scrit
• Aritmetica & algebra: 60 minutas examen en scrit
• Geometria: 60 minutas examen en scrit
  

*Cun l’annunzia per l’examen decleran las candidatas ed ils candidats ensemen cun las educaturas ed ils educaturs l’emprima lingua, q. v.d. quella lingua chantunala en la quala ellas/els vegnan examinads e survegnan las dumondas da l’examen (decleraziun persunala). Excepziun: Per ils roms aritmetica & algebra, sco er geometria na datti naginas dumondas per rumantsch.

Disposiziuns davart las enconuschientschas preliminaras

Disposiziuns davart las enconuschientschas preliminaras Englais: Verbs irregulars

Disposiziuns davart las enconuschientschas preliminaras Tudestg: Detailliste Sprache im Fokus (document per tudestg)

Calculaziun da las notas

La nota finala (media da l'examen) ch'è relevanta per l'admissiun en la 3. classa gimnasiala sco er en la 1. classa da la SMC, SMI u SMS d'ina scola media grischuna, vegn calculada sco media arrundada sin duas cifras suenter la comma, quai sin fundament da la nota dal rom d'examen en l'emprima lingua, da las notas d'englais, d'aritmetica ed algebra, da geometria e da la nota d'admissiun.

Notas dals roms d'examen

Mintga rom d’examen (emprima lingua, englais, aritmetica & algebra, geometria) quinta sco atgna nota d’examen. Las prestaziuns en ils roms d'examen vegnan valitadas cun quartas notas.

Nota d’admissiun

Las candidatas ed ils candidats che fan l’examen d’admissiun suenter la 2. classa da la scola secundara, han il dretg d’ina nota d’admissiun. Tut las autras candidatas e candidats na pon betg far valair quest dretg.

La nota d’admissiun vegn calculada a maun da l’emprim attestat da semester da la 2. classa d'ina scola secundara en il chantun Grischun, arrundada sin duas cifras suenter la comma da las notas dals 6 roms:

• Geografia
• Istorgia
• Natira e tecnica
• Art figruativ
• Chant e musica
• Moviment e sport   

Calculaziun d’exempel da las notas d’examen (document per tudestg)

 > Calculatur da notas d'examen

(document per tudestg)

Remartga (pertutga mo scolaras e scolars da la 2. classa da la scola secundara): L’avrigl 2023 ha la regenza grischuna decidì, che la valitaziun da la nota d’admissiun da la 2. classa da la scola secundara vegnia adattada en l’avegnir. Igl è anc nuncler, cura che quella adattaziun vegn realisada. Per la realisaziun da quest conclus sto vegnir preparada ina revisiun da l’ordinaziun davart la procedura d’admissiun en las scolas medias. Quai chaschuna ulteriurs scleriments ed ulteriuras lavurs. Per l’examen unifitgà 2025 las disposiziuns d'enfin ussa senza midadas.

Criteris d’admissiun

Per reussir l'examen d'admissiun per la 3. classa dal gimnasi sto vegnir cuntanschida ina media d'examen da 4.50 tar l'examen unifitgà. Ultra da quai na dastgan las notas dals roms examinads betg esser pli che 1.5 puncts sut 4 (notas sut 4) e quai per tut las partiziuns. La nota d'admissiun quinta sco nota dals roms d'examen.

Per reussir l'examen d'admissiun en la SMS/SMI/SMC sto vegnir cuntanschida ina media d'examen da 4.00 tar l'examen unifitgà. Ultra da quai na dastgan las notas dals roms examinads betg esser pli che 1.5 puncts sut 4 (notas sut 4) e quai per tut las partiziuns. La nota d'admissiun quinta sco nota dals roms d'examen.

Meds auxiliars e material

• Ils candidats ston s’identifitgar tar ils examens d’admissiun entras in palpiri d’identitad valaivel. (carta d’identitad, pass u legitimaziun d’esters).
• Als examens ston las candidatas ed ils candidats purtar material da scriver (stilograf u culli [blau u nair], rispli, colurs [incl. ina colur verda per marcar schliaziuns en ils pensums da geometria]), gumma, gizzarisplis, circul, geotriangul e lingera.
• En il rom d’examen geometria pon ins duvrar in calculatur senza CAS, che n’è betg programmabel u capabel da far graficas. Segirai per plaschair ad uras avant l’entschatta da l’examen d’admissiun, che Vus avais in calculatur da giaglioffa lubì. I vegn cusseglià, en cas da dubi, da dumandar suenter ad uras tar Vossa persuna d’instrucziun da matematica u en ina fatschenta spezialisada. In model lubì e fitg derasà sin il stgalim secundar I e II è il calculatur da giaglioffa TI-30X Plus (betg da sbagliar cun il calculatur da giaglioffa betg lubì TI-30X Pro).

Ulteriuras infurmaziuns

Per l’examen dastgan vegnir duvrads mo ils documents dals examens (nagin agen palpiri da notizias). Tut ils exercizis èn da schliar directamain sin ils documents d’examen. Ils examens ston vegnir scrits cun culli blau u nair u cun tinta blaua u naira (cun excepziun dals dissegns geometrics). Fieuters da pilot n’èn betg lubids. Il diever d’in rispli è cun excepziun da las construcziuns da schliaziuns geometricas en il rom d’examen geometria betg lubì.

En ils roms d’examen emprima lingua, Englais sco era aritmetica ed algebra n’èn lubids nagins meds auxiliars. L’utilisaziun da marcaders, da la lingera e dal geotriangul è lubida.

Durant ils examens n’èsi betg lubì da duvrar dicziunaris monolings u bilings u dicziunaris electronics sco era telefons mobils (telefonins), smartwatches u auters meds d’agid.

Exempels d'examens

Exempels d’examens dals davos 4 onns: Exempels d'examens

Las dumondas las pli frequentas 

Dastg jau duvrar fieuters da pilot?

Na. La tinta dals fieuters da pilot svanescha tar influenza da chaud (chalira da fricziun). Tar ils documents stampads da d’omadus varts exista il privel, che en cas da correcturas tras far or cun la gumma vegn la scrittira sin la vart davos illegibla resp. svanescha.

Poss jau prender cun mai ina pitschna marenda ed ina bavronda en la stanza d’examen?

Gea.

Lubescha l’examen d’admissiun reussì en la SMC, SMI u SMS a mai
era l’entrada en la scola da maturitad professiunala dal chantun Grischun?

Da princip gea. As drizzai per raschuns da cumpetenza per ulteriuras infurmaziuns a l'Uffizi per la furmaziun professiunala, Grabenstrasse 1, 7001 curia, tel 081 / 257 27 68 u info@afb.gr.ch.