La Regenza ha deliberà la strategia da biodiversitad dal Grischun. La strategia metta l'accent sin quai che las proximas generaziuns grischunas dovran per valurs natiralas, tranter auter er per dumagnar meglier las sfidas sco l'adattaziun al clima.
Per tge ch'i sa tracta èsi impurtant
La biodiversitad è il chapital natiral e pia ina part essenziala da la ritgezza dal chantun Grischun. Pli ritg ch'il chapital natiral è e pli bain ch'il chapital natiral po dumagnar sfidas sco l'adattaziun al clima u la segirezza alimentara a las generaziuns futuras. En il rom dal punct central da svilup 9.1 dal program da la regenza 2021–2024 ha la regenza perquai deliberà la strategia da biodiversitad dal Grischun 2023-2032 ed il tom da mesiras per l' emprima etappa da realisaziun 2023-2028.
Promoziun e cooperaziun empè da restricziuns
La direcziun da la strategia da biodiversitad va sapientivamain la via da la promoziun empè da restricziuns. Decisiuns e cumportaments persistents en il sistem economic duain vegnir recumpensadas pli ferm e l'atgna responsabladad duai vegnir rinforzada.
Far quai ch'è realisabel a dretg temp
La strategia da biodiversitad vegn realisada en duas etappas 2023–2028 e 2029–2032 en il senn da "far il dretg temp". Las mesiras èn mesirablas, las responsabladads èn attribuidas, ed il basegn da resursas vegn apprezià. Il stadi da realisaziun vegn registrà mintga onn. Ina evaluaziun intermediara vegn a furnir enconuschientschas preziusas per la segunda etappa da realisaziun.
Resultats da l'audiziun
Sco part da l' audiziun publica ha servì ina retschertga che sa basa sin il web. Circa in terz da las vischnancas e da las regiuns grischunas, numerusas federaziuns, firmas ed instituziuns da perscrutaziun sco er 65 persunas privatas da differents secturs han prendì posiziun. La gronda maioritad da las persunas che han prendì posiziun (passa 80%) ha giuditgà il project en general sco positiv u plitost positiv.
Ils proxims pass
La realisaziun da la strategia da biodiversitad resp. da las mesiras dependa ussa fermamain da las resursas disponiblas dals posts spezialisads, dentant er da la prontezza da cooperar activamain e da las resursas disponiblas dals partenaris d'ordaifer l'administraziun. En ses conclus renconuscha la Regenza il basegn supplementar da resursas finanzialas e da persunal sin plaun chantunal per realisar la SBD GR (DG 316/2024). Il Cussegl grond vegn a decider la fin da l'onn 2024 davart las dumondas dal preventiv.
Fin a la decisiun dal cussegl grond vegn il UNA a realisar en collavuraziun cun ils uffizis collegials e resguardond las resursas da persunal disponiblas be quellas mesiras che pertutgan gia projects currents.
Quels che coopereschan gugent sco partenari da project e che han annunzià interess per realisar ina mesira, vegnan infurmads a dretg temp dal manader respectiv da la manadra da mesiras per il kickoff. Nus supplitgain dentant anc per in zic pazienza fin che la decisiun dal cussegl grond è avant maun.