Il Sport per creschids Svizra (esa) è in program da promoziun da sport da la Confederaziun, ch'è orientà al sport da massa e da temp liber. En collavuraziun cun organisaziuns partenarias avisescha quest program in standard da qualitad unitar en la scolaziun ed en la furmaziun supplementara da las manadras e dals manaders.

Per tegnair quint dals differents basegns da las persunas creschidas sustegna esa purschidas da moviment e da sport tant en conturns privats sco er en conturns professiunals. esa unescha sut in tetg purschidas e scolaziuns da sport d'organisaziuns senza profit (uniuns, fundaziuns e.u.v.), da purschidras e purschiders da sport commerzials sco er da talas da patrunas e patruns (sport en il manaschi).

Il UFSPO e graubündenSport s'engaschan per ina promoziun dal sport per vita duranta. Entant che la furmaziun da sport per uffants e per giuvenils vegn promovida da Giuventetgna+Sport (G+S), stgaffescha esa las premissas idealas per purschidas da moviment e da sport che han in bun effect per la sanadad da persunas creschidas da 18 onns e pli veglias.