Dapi l'onn 2005 porscha graubündenSport la retscha d'occurrenzas «Update!Sport». Dapi l'onn 2021 èn la Scola auta spezialisada dal Grischun (SASGR) e l'Associaziun grischuna da sport (AGS) partenarias da las occurrenzas. Mintga onn vegnan purschids differents curs attractivs da scolaziun e da furmaziun supplementara. Ils moduls sa drizzan a funcziunarias e funcziunaris, a trenadras e trenaders sco er a manadras e manaders da G+S ed a coachs da G+S en uniuns da sport en il chantun Grischun. Tut las referentas ed ils referents han enconuschientschas spezialas profundas e dattan cussegls utils per las activitads correspundentas da las uniuns. En ils moduls da furmaziun supplementara dad «Update!Sport» vegnan recepidas e tractadas da maniera fitg pratica tematicas actualas che resultan da la lavur en las uniuns da sport.
Furber vers l'avegnir: Intelligenza artifiziala per las uniuns da sport
Venderdi, ils 27 da settember 2024
18.00 – 21.00, Scola auta spezialisada dal Grischun, Cuira
Pretsch: francs 45.–
Co po in'uniun da sport trair a niz l'intelligenza artifiziala (IA)?
En quest modul ans profundain nus en il mund da la IA ed emprendain ad enconuscher ses avantatgs e dischavantatgs sco er ses cunfins. Nus emprendain, co che nus pudain nizzegiar la IA per uniuns da sport e rimnain experientschas praticas
Referent: Mike Schwede, digital-strategist, interprendider e docent a differentas scolas autas cun diploms da scolaziun supplementara en il sectur dad IA a la Oxford University ed al Massachusetts Institute of Technology. (MIT)
Far videos curts per social media
Glindesdi, ils 28 d'october 2024,
18.00 – 21.00, max. 24 participantas e participants, Scola auta spezialisada dal Grischun, Cuira
Pretsch: francs 45.–
En il seminari davart videos e tecnica da tagliar emprendain nus d'elavurar content attractiv per social media.
Nus experimentain ils avantatgs e las schanzas da content animà e discutain no-gos e ristgas. A maun d'exempels concrets emprendain nus il necessari per pudair preschentar messadis d'ina uniun da sport en videos curts/GIFs. En sequenzas d'exercizi praticas elavurain e publitgain nus plinavant agens videos/reels.
Referenta: Priszilla Medrano, experta da social media, designra e producenta da podcasts
Prevenziun da blessuras da sport fisicas
Sonda, ils 9 da november 2024
09.00 – 17.00 Uhr, max. 24 participantas e participants, Center da furmaziun per la sanadad ed ils fatgs socials, Cuira
--> prolunghescha la renconuschientscha da G+S giuvenils
Pretsch: francs 90.–
«Prevenziun avant intervenziun, e sch'i capita lura tuttina insatge», uschia pudess ins resumar il cuntegn da quest modul pratic e teoretic.
Tenor il Post da consultaziun per la prevenziun d'accidents sa blessan en Svizra mintg'onn var 430 000 persunas durant far sport, quai cun ina tendenza creschenta. Perquai che blessuras n'èn betg mo ina dumonda da fortuna u disfortuna, ans deditgain nus a furmas da trenament correspundentas, cun las qualas eventualas blessuras e lur grevezza sa laschan reducir cleramain. Ultra da la preschentaziun da programs da trenament preventivs vegn però er tematisà il proceder en cas d'ina blessura da sport acuta.
Referents: Marc Gini, ant. sportist professiunal, fisioterapeut, trenader d'atletica, terapeut FOI & APM | Thomas Holtkamp, expert dipl. tgira intensiva ed expert Swiss Cycling Guide | Lieni Widmer, expert G+S