Situaziun da partenza

Cun las structuras da la scolaziun da Giuventetgna+Sport (G+S) dispona la Svizra d'in sistem excellent da scolaziun e da furmaziun supplementara per manadras e manaders da sport. G+S è avert per manadras e manaders pir a partir dal 18. onn da vegliadetgna. Per giuvenils na datti nagina scolaziun unitara e renconuschida en quest sectur.

Gist tar uniuns stat il chattar ed il tegnair manadras e manaders en uffizi d'onur sisum sin il barometer dals quitads. Supplementarmain sa reduceschan las commembranzas en in'uniun cleramain a partir dal 13. onn da vegliadetgna. Sco mesira per fundar in'uniun e per segirar a lunga vista la generaziun giuvna da manadras e manaders è pervia da quai vegnida stgaffida – en collavuraziun cun las federaziuns – ina scolaziun adequata da giuvnas manadras auxiliaras e da giuvens manaders auxiliars a partir da 14 onns.

Intenziun

graubündenSport ha mess en pe – analogamain a G+S – ina scolaziun per manadras auxiliaras e manaders auxiliars tranter 14 e 18 onns ed indemnisescha lur engaschament en curs da G+S.

En ina scolaziun da dus dis vegnan las participantas ed ils participants preparads da surpigliar emprimas activitads da trenadra u trenader en uniuns u tar curs da sport da scola voluntar. Ellas ed els vegnan adina accumpagnads en quest connex da manadras e manaders da G+S renconuschids (sistem da padrinadi).

En la scolaziun vegnan intermediadas a las manadras auxiliaras ed als manaders auxiliars las cumpetenzas da basa dal manar (cumportament da manader, esser in exempel, manar gruppas, chaussas organisatoricas e.u.v.) e la basa per surpigliar en il trenament per exempel il currer en, ina sequenza da gieu u ina incumbensa da gruppa.

Finamiras da 1418Leiter

• Dar als giuvenils l'instrumentari necessari per surpigliar la funcziun da manadra auxiliara u manader auxiliar
• Promover l'engaschament da manadras auxiliaras e manaders auxiliars en il chantun Grischun
• Promover e segirar a lunga vista la generaziun giuvna da manadras e manaders en il chantun Grischun
• Integrar a media vista il program chantunal en G+S

Custs

La participaziun a la fin d'emna da 1418Leiter è gratuita e cumpiglia la scolaziun, l'alloschi e l'alimentaziun per tuts dus dis. Unicamain il viadi dal domicil al lieu dal curs ed enavos ston las participantas ed ils participants organisar e pajar sezs.