Proposta electorala: sutsegnadras e sutsegnaders
Tge èn dumbers minimals da suttascripziuns?
Mintga proposta electorala sto da princip vegnir suttascritta d'almain 100 persunas cun dretg da votar che han lur domicil politic en il chantun Grischun. Ina persuna cun dretg da votar dastga suttascriver maximalmain ina proposta electorala. Ils dumbers minimals èn dependents dal dumber da sezs en il Cussegl naziunal (art. 24 al. 1 LDP).
Datti excepziuns da la necessitad da furnir dumbers minimals da suttascripziuns?
Gea. Ina partida politica è liberada dal dumber minimal, sch'ella è sa laschada registrar fin il pli tard ils 31 da december 2022 confurm a l'urden tar la Chanzlia federala e sch'ella represchenta durant la perioda d'uffizi scadenta il medem circul electoral en il Cussegl naziunal u ha survegnì – a chaschun da las elecziuns per la renovaziun totala dal Cussegl naziunal dals 20 d'october 2019 – en il medem chantun almain 3 pertschient da las vuschs (art. 24 al. 3 LDP). En quests cas ston las persunas che presidieschan ed administreschan la partida suttascriver la proposta electorala (art. 24 al. 4 LDP).
Tge pretensiuns valan per suttascriver la proposta electorala?
Las sutsegnadras ed ils sutsegnaders ston avair lur domicil politic en il chantun Grischun. Ina persuna cun dretg da votar dastga suttascriver maximalmain ina proposta electorala. Suenter che la proposta electorala è vegnida inoltrada, na po la suttascripziun betg pli vegnir retratga.