Cun la publicaziun «Integraziun en il focus 2023» che cumpara ina giada l'onn dain nus mintgamai la primavaira in'invista en las incumbensas ed ils projects che occupan nus en il rom dal program chantunal d'integraziun. Mintga ediziun focussescha sin l'accent da l'onn actual dal Post spezialisà per l'integraziun. L'onn 2023 èn quai la famiglia.

Editorial Nahid Kouchekzadeh Dandansaz, interpreta interculturala

Preziada lectura, prezià lectur

Per las decisiuns da nus creschids s'empon quels il main da tut, che pateschan il pli fitg dad ellas: ils uffants e giuvenils. Zunt radicala po esser per els la decisiun dals geniturs da bandunar l'ambient usità e da tschertgar la fortuna per la famiglia u – sco en noss cas – la segirezza en in nov pajais ch'è dal tuttafatg ester. Cura che nus essan fugids da l'Iran ils onns 1980, essan nus arrivads sur la Germania en Svizra e la finala a Cuira. Durant tut ils strapatschs sin la fugia avain nus gì gronda fortuna: mes um, mes dus uffants pli gronds ed jau avain adina pudì restar ensemen. Arrivads en Svizra, han dentant mia figlia da quella giada 15 onns e mes figl da 14 onns fatg exactamain quellas experientschas che blers che migreschan fan «pir» sco giuvenils – per exempel en la reuniun da la famiglia.

Omadus han patì da betg pudair ir a scola e da betg dastgar cumenzar in emprendissadi. Malgrà ch'els eran fitg motivads, discurrivan bain tudestg ed avevan tscherts duns, n'ha il sistem betg permess quai. Entant che lur amias ed amis devan gas cumplain e pudevan giudair lur plaschair da viver e d'emprender, èn mes uffants ids a finir – pervia da la procedura d'asil dad onns – en ina via tschorva. Quai ha gì consequenzas per l'entira vita da famiglia. La malavita e la mancanza da perspectivas dals uffants han exaurì er nus geniturs. Grazia a la decisiun da dimora positiva han per fortuna omadus tschiffà pe en ina professiun ed èn oz tuttina cuntents sco mes um ed jau. Restadas èn las largias en il provediment per la vegliadetgna e las nauschas regurdientschas. Plinavant la persvasiun che nus stuain pussibilitar las medemas schanzas a tut ils uffants e giuvenils. Uschia sco che jau emprov da far quai cun mes biadis ed en mia lavur sco interpreta interculturala.

Editorial Felix Birchler, manader dal Post spezialisà per l'integraziun

Preziada lectura, prezià lectur

Betg mo sco bab hai jau grond respect d'experientschas, declera Nahid Kouchekzadeh Dandansaz. Or da mia perspectiva professiunala sai jau, che la migraziun signifitga sfidas spezialas per uffants e giuvenils. In fatg gist uschè remartgabel ma para dentant, che blers geniturs da l'emprima generaziun immigrada resentan in profund sragischament ed ina perdita da lur status. Els prendan dentant en cumpra quai per lur uffants. In tschert sacrifizi per l'avegnir da lur descendenza, che n'è betg adina chapaivel, sch'ins guarda d'ordaifer.

Er perquai èsi noss giavisch, da metter il focus da nossa communicaziun – cun l'accent annual Famiglia – sin il stadi e sin las experientschas da pèrs, da geniturs e d'uffants che han da nov il center da lur vita communabla en Svizra ed en il Grischun. Questa publicaziun cumenza cun quai ed As pussibilitescha – grazia al focus Reuniun da la famiglia – invistas d'in aspect tut spezial. La tematica da la famiglia vegnin nus a cumplettar quest atun cun la publicaziun MIX – il Magazin per diversitad en il Grischun – e cun l'occurrenza da colliaziun MIX-Café. Sajas mirveglius e mantegnai l'interess.

Text: Philipp Grünenfelder