Vopnas da las vischnancas

La suandanta tabella cuntegna las descripziuns valaivlas da las vopnas da las vischnancas grischunas. Il diever da las vopnas è reglà giuridicamain.

I vegn recumandà da dumandar la vischnanca correspundenta, sch'i dat malsegirezzas davart l'utilisaziun d'ina vopna communala. Quai vala en spezial per utilisaziuns commerzialas.

Remartga:

- Vus pudais retrair las vopnas en 5 differents formats da datoteca. Resguardai per plaschair: Per ils formats TIFF, EPS e PDF valan las valurs da colur CMYK dal standard eraldic grischun, per ils formats JPG ed SVG percunter las valurs RGB.

- Vus na pudais betg mo tschertgar nums da vischnancas, mabain er noziuns en las descripziuns da las vopnas, colurs da las vischnancas sco er regiuns.

Tschertga (endataziun manuala)

Dumber da vischnancas: 101

Vischnanca	Vopna	Descripziun / blasonament	Downloads
Alvra		Sin cotschen, sur duas undas en argient e blau, set stailas dad aur da tschintg pizs, posiziunadas en in circul (2, 2, 2, 1).
Andeer		Sin argient, sin ina campagna naira cun curnisch dentada, in urs nair che chamina sidretg, cun armadira cotschna.
Arosa		Sin blau, sur ina muntogna d'argient da dus pizs, in sulegl dad aur cun radis.
Avras		Dividì diagonalmain d'argient e da nair giu a dretga, sin argient in capricorn nair siglient, cun armadira cotschna.
Bever		Sin aur, son Giatgen en vestgì blau che chamina cun bastun da viandar.
Bravuogn Filisur		Sin argient, in griffun nair che stat sidretg, cun armadira cotschna.
Bregaglia		Sin argient, sin ina campagna naira cun curnisch dentada, in capricorn nair che chamina sidretg, cun armadira cotschna.
Breil		Sin blau, sur trais pizs d'argient, quel d'amez surpostond ils dus exteriurs e cuntegnend ina tur cotschna cun curnisch dentada, cun chavas nairas e cun duas fanestras ina sur l'autra, in sulegl dad aur senza fatscha cun sedesch radis gulivs.
Brusio		Sin cotschen, ina crusch d'argient cun bratscha fin a l'ur.
Buseno		Sin cotschen, ina glina dad aur ascendenta, suravia ina staila dad aur da sis pizs.
Calanca		Sin verd, in liun dad aur che stat sidretg, cun armadira cotschna, purtond ina spada d'argient cun tegn dad aur en la tschatta dretga davant.
Cama		Sin aur, ina crusch cotschna da son Murezi, sisum da mintga vart ina staila cotschna da sis pizs.
Castaneda		Sin aur, sin ina muntogna verda da trais muts, in chastagner verd cun fritgs.
Cazas		Sin blau, son Martin en argient a chaval, partend il mantè dad aur cun il murdieu.
Churwalden		Sin mellen, in fasch blau diagonal si da sanestra che cuntegna ina spia melna, ina staila melna da sis pizs ed in mogn da miniers mellen.
Claustra		Sin aur, l'Um selvadi en pe, en il maun dretg ina bandiera blaua cun crusch d'argient.
Cuira		Sin argient, ina porta da citad en cotschen cun trais curnischs dentadas, en la porta in capricorn nair che stat sidretg, cun armadira cotschna.
Cunter en il Partenz		Sin blau, in agnè d'argient che chamina.
Domat		Sin aur, en pe, son Gion Battista en argient cun mantè cotschen, en il maun dretg ina ferula, en il maun sanester l'agnè da Dieu en argient che giascha sin la Sontga Scrittira.
Falera		En cotschen, la baselgia da son Rumetg en argient.
Farera		Dividì diagonalmain dad alv e da nair giu a dretga, cuntegnend in martè da miniers en colurs invertidas.
Farschno		Sin argient, sin ina campagna verda, ina porta naira cun curnisch dentada e cun giatrera.
Favugn		Sin blau, la Giustizia en argient (cun stadaira e spada).
Fideris		Sin aur, in'evla blaua pronta per tschiffar, cun armadira cotschna.
Fläsch		Sin blau, trais spias dad aur che creschan or d'ina campagna dad aur.
Flearda		Sin aur, duas mazzas cotschnas cruschadas diagonalmain, accumpagnadas da quatter cullas cotschnas.
Flem		Sin cotschen, en aur, son Martin a chaval, partend il mantè cun il murdieu.
Furna		Sin blau, ina mesaglina dad aur ascendenta, suravia duas frizzas dad aur cruschadas diagonalmain, cun pizs d'argient.
Giuvaulta		Sin argient, sut in chau blau che cuntegna ina staila dad aur da sis pizs, in bigl cotschen cun aua blaua.
Grono		Sin aur, ina campagna cotschna, cuntegnend trais fegls d'iva verds cun monis d'argient entretschads.
Grüsch		Sin aur, ina crusch blaua cun bratscha fin a l'ur.
Ilanz/Glion		Sin cotschen, in flum blau cun ur argientà (Rain) che curra diagonalmain giu a dretga tras ina curuna dad aur.
Jenaz		Dividì da blau e dad aur, sin blau ina staila dad aur da sis pizs, sin aur dus pals blaus.
Jenins		Sin argient, duas barloccas d'ivas blauas che pendan vi da monis da fegls verds entretschads.
Küblis		Sin aur, in mez chamutsch nair, cun armadira cotschna.
La Punt Chamues-ch		Sin nair, sin ina campagna d'argient ondulada, ina punt artgada en aur, suravia in zain d'argient cun la crusch da son Andreas.
Laax		Sin blau diagonalmain si da dretga, in pesch d'argient ascendent.
Landquart		Dividì diagonalmain d'argient e da nair giu a dretga, sin argient in capricorn nair siglient ornà che porta ina facla cun flomma cotschna-melna, sin nair, en posiziun verticala, ina clav d'argient cun la barba sisum.
Lantsch		Sin blau, in chaval da sauma en argient (en alv) cun in butschinet cotschen (barigl).
Lostallo		Sin cotschen, en pe, in liun cun alas, cun nimbus d'argient e banderola.
Lumnezia		Sut in chau cotschen, en ina muntogna d'argient da trais pizs, porta naira cun tetg.
Luzein		Dividì diagonalmain da blau e dad aur si da sanestra, sin blau ina frizza dad aur ascendenta, sin aur in mez sgol blau.
Madulain		Sin nair, in alumbard d'argient en posiziun verticala, cuntegnend in corn d'argient, dal qual la corda è messa enturn il moni da l'alumbard.
Maiavilla		Sin blau, trais stailas dad aur da sis pizs (2, 1).
Malans		Sin blau, sin in M dad aur, ina crusch dad aur.
Masagn		Sin argient, sin ina muntogna verda d'in mut, in buc-chavriel cotschen.
Medel (Lucmagn)		Sin argient, son Martin sin in chaval nair, partend il mantè cotschen cun il murdieu.
Mesauc		Dividì da cotschen e dad aur cun curnisch dentada (dents crennads).
Muntogna da Schons		Sin cotschen, trais pizs d'argient che cuntegnan in timun blau ondulà sbassà, sur tut vi in sulegl d'aur senza fatscha.
Mustér		Sin blau, ina crusch da son Andreas en argient.
Panaduz		Sin argient, in timun blau, suravia ina staila cotschna da sis pizs.
Puntraschigna		Spartì da nair e dad aur, cuntegnend ina punt artgada en argient.
Puschlav		Sin cotschen, duas clavs d'argient, cruschadas diagonalmain, cun la barba sisum, colliadas tras ina chadaina d'argient.
Razén		Spartì da cotschen e da blau, sin blau dus faschs d'argient.
Rossa		Sin cotschen, in fasch d'argient diagonal giu a dretga che cuntegna ina frastga da tigl verda.
Roveredo		Sin cotschen, in ruver dad aur cun ragischs, cun fegls e fritgs dad aur.
Runtgaglia		Sin aur, in piz blau cun il chau engiu che cuntegna ina punt d'argient.
Sagogn		Sin aur, son Columban en nair, cun nimbus d'argient, tastga e bastun da viandar.
Samedan		Sin nair, in dieu da l'aua en aur, cun rembel dad aur e recipient d'aua.
Samignun		Sin cotschen, ina crusch d'argient cun bratscha fin a l'ur, sisum da mintga vart ina conchiglia d'argient.
San Murezzan		Sin aur, ascendent, son Murezi en armadira blaua, cun nimbus d'argient, spada e bandiera blaua cun crusch dad aur da son Murezi.
San Vittore		Sin cotschen, ina spada d'argient cun tegn dad aur, cruschada diagonalmain cun ina ferula dad aur cun banderola d'argient.
S-chanf		Sin blau, tschintg spias d'ierdi en aur.
Scharàns		Spartì d'argient e da nair, sin argient trais fegls da tigl verds.
Schiers		Sin blau, ina crusch dad aur cun bratscha fin a l'ur.
Schlarigna		Dividì dad aur e da cotschen, sin aur ina roda-mulin cotschna, sin cotschen in arvieut dubel d'in tschaler en argient, cun pitgas da sustegn.
Schluein		Spartì da blau e dad aur, sin blau ina clav dad aur cun la barba sisum, sin aur ina spada blaua.
Schmitten		Sin blau, in scepter dad aur, cruschà diagonalmain cun in fist d'uvestg en aur.
Scuol		Sin aur, ina funtauna siglienta cun cuppa naira e quatter radis d'aua en blau ed argient.
Seewis		Sin aur, in aviez verd cun ragischs.
Segl		Dividì da blau e dad aur, sin blau in sulegl dad aur cun radis, sin aur ina litgiva blaua.
Seglias		Sin argient, in capricorn nair che stat sidretg, cun armadira cotschna, che porta ina claviglia naira da la roda d'in char.
Silvaplauna		Sin argient, sin ina campagna blaua, in capricorn nair che stat sidretg, cun armadira cotschna.
Soazza		Sin aur, sin in chaval nair cun cumet cotschen, son Martin en armadira cun nimbus d'argient, partend il mantè cotschen cun il murdieu en pe.
Sta. Maria en Calanca		Sin blau, en pe sin ina retscha da nivels en argient, sontga Maria Assunta en aur, cun curuna e cun nimbus d'argient, da mintga vart ina staila dad aur da sis pizs.
Sufers		Sin cotschen, sur in flum blau cun ur argientà (Rain), ina crusch latina en argient.
Sumvitg		Dividì d'argient e da nair, sin nair ina staila d'argient da sis pizs, sin argient ina figura da schah naira.
Sursaissa Mundaun		Spartì da cotschen e da blau, sin cotschen, ina clav dad aur en posiziun verticala cun la barba sisum, sin blau dus faschs d'argient.
Surses		Sin argient, in piz nair ascendent sbassà, suravia ina gilgia naira.
Tavau		Quadrà da blau e dad aur, cuntegnend ina crusch quadrada en colurs invertidas.
Trimmis		Sin argient, sur ina muntogna verda da trais pizs, a travers vers dretga (giaschent), duas cornas nairas da capricorns cun la ragisch.
Trin		Sin aur, sur ina porta naira cun curnisch dentada, quatter stailas cotschnas da sis pizs.
Trun		Sin argient, in ischi cun ragischs, cun in bist nair e tschintg fegls verds.
Tschappina		Sin cotschen, sur ina culmaina dad aur a stgalims, in zain dad aur.
Tschiertschen-Praden		Sin blau, in pal mellen che cuntegna ina staila blaua da sis pizs, a dretga sin blau in bastun mellen en posiziun verticala, a sanestra sin blau ina spia melna.
Tujetsch		Sin cotschen, en argient, ina punt rinforzada da duas turs.
Tumein		Sin verd, ina staila dad aur da sis pizs.
Tumleastga		Sin aur, in mailer verd sragischà cun otg fritgs.
Tusaun		Sin cotschen, in liun dad aur en pe, cun barlocca da la cua dubla, purtond in scepter da gilgia (fist da dretgira) en aur en la tschatta dretga davant.
Urmagn		Sin cotschen, in mez liun dad aur che tegna ina frizza dad aur en la tschatta dretga.
Val Müstair		Sin blau, il purtret da Carl il Grond en aur (profil).
Val S. Pieder		Dividì diagonalmain dad aur e da nair giu a dretga, sin aur ina stgala naira da blocs (stgala da Belmont), sin nair ina clav dad aur cun la barba sisum, vulvida vers dretga.
Val Stussavgia		Sin blau, ina crusch gironnada d'argient e da nair.
Valragn		Sin cotschen, sur in flum blau cun ur argientà, tschintg stailas d'argient da sis pizs (3, 2).
Valsot		Dividì diagonalmain d'argient e da nair si da sanestra, sin argient in capricorn nair che stat sidretg, cun armadira cotschna, purtond in tscharesch nair, sin nair in unicorn d'argient che stat sidretg, cun armadira cotschna.
Vaz		Sin argient, sut in chau cotschen che cuntegna quatter stailas d'argient da sis pizs, in capricorn nair che stat sidretg, cun armadira cotschna.
Vaz Sut		Sin argient, in capricorn nair che stat sidretg, cun armadira cotschna, che tegna in giatter nair da son Luregn.
Zernez		Dividì, part sura spartida: 1. sin nair, in piz d'argient elevà che cuntegna in capricorn nair siglient cun lieunga cotschna; 2. sin argient, sin ina muntogna verda da trais muts, trais turs nairas cun curnischs dentadas, la tur entamez elevada; 3. sin argient, in urs nair che stat sidretg, cun lieunga cotschna, che tegna in aviez verd sragischà cun mutagl cotschen.
Ziràn-Reschen		Sin argient, son Martin en pe, cun nimbus dad aur, partend il mantè blau cun il murdieu, sisum da mintga vart ina staila cotschna da sis pizs.
Zizers		Sin argient, in capricorn nair che chamina sidretg, cun armadira cotschna, che porta ina clav naira cun la barba sisum.
Zuoz		Sin nair, in fist d'uvestg en aur che va diagonalmain giu a dretga, cruschà diagonalmain cun ina spada d'argient cun tegn dad aur, suravia ina curuna dad aur.