Lavurar là, nua che auters fan vacanzas: Il Grischun è er attractiv sco lieu economic. In avantatg dal lieu porscha betg sco ultim il clima fiscal ch'è favuraivel per l'economia.
L'internaziunalitad ha tradiziun en il Grischun. Il turissem sco branscha economica dominanta e las numerusas interpresas internaziunalas promovan il clima multicultural. Varsaquantas firmas internaziunalas – sco Würth, Hamilton, la gruppa Hoppe u Trumpf – han tschernì gia daditg il Grischun sco lieu da producziun. Tar ils manaschis industrials impurtants cun in'attracziun internaziunala tutgan er la Ems-Chemie u la CEDES.
Lieu economic attractiv
In clima fiscal ch'è favuraivel per l'economia, persunal ch'è scolà fitg bain, ina gronda productivitad da lavur ed ina buna infrastructura porschan avantatgs dal lieu, e quai betg mo ad interpresas che lavuran sin plaun internaziunal, mabain gist er a manaschis pitschens e mesauns.
Diversitad economica
En il Grischun lavura oz la gronda part da las emploiadas e dals emploiads en il sectur da servetschs (74 pertschient). Il center dal sectur da servetschs è la chapitala da Cuira. Il sectur da l'industria e dal mastergn ha ina quota da 20 pertschient, il sectur agrar e forestal ina quota dad 5 pertschient.
Ad in factur economic spezial è sa sviluppada en il Grischun – ultra dal turissem – er la producziun d'aua minerala. La svieuta annuala da l'aua minerala dal Grischun vegn stimada a var 200 milliuns francs. Las funtaunas d'aua minerala las pli enconuschentas sa chattan a Val S. Pieder, a Razén ed a Passugg sper Cuira.
Promoziun da l'economia
In post da consultaziun central per interpresas novas ed existentas è la promoziun da l'economia dal chantun Grischun. Ella ha ina funcziun d'infurmaziun e da coordinaziun e sustegna interprendidras ed interprendiders giuvens en moda efficazia, sch'ellas e sch'els vulan fundar ina interpresa. Per realisar projects specifics che stgaffeschan u che mantegnan plazzas da lavur ubain projects che augmentan en autra moda la plazza economica grischuna, stattan a disposiziun instruments da promoziun sin plaun chantunal e federal.