La planisaziun e la direcziun dal traffic public survegn en l'avegnir dapli attenziun en il chantun Grischun. Il concept chantunal dal traffic public serva sco instrument planisatoric e directiv e cuntegna ina planisaziun rullanta e da plirs onns dal traffic public, la quala vegn accordada cun las planisaziuns surordinadas. Sin fundament da la revisiun da la Lescha davart il traffic public en il chantun Grischun (LTrP), ch'è entrada en vigur il 1. da schaner 2023, vegn il concept elavurà per l'emprima giada ils onns 2023 e 2024.

Il concept dal traffic public vegn approvà da la Regenza. Las vischnancas, las corporaziuns da vischnancas e las regiuns pon sa far valair sur las presidentas u ils presidents da la regiun d'urari respectiva. Plinavant vegnan consultadas las interpresas da transport ch'èn activas en il chantun.