Il traffic public cun trens e bus presta ina contribuziun impurtanta a l'attractivitad dal Grischun ed è in multiplicatur per il turissem. Sco in dals pli gronds patruns ed incumbensaders dal Grischun ha il traffic public er ina gronda impurtanza economica. Quai vala particularmain per la Viafier retica ch'è la pitga principala dal traffic public grischun.

Per satisfar meglier als basegns futurs e per cuvrir las frequenzas maximalas dal traffic da temp liber e dal traffic pendular, survegn il Grischun cun Retica30+ il tact da mes'ura en tut il chantun sco er ina purschida da viafier cleramain meglra cun novas colliaziuns directas e puncts centrals da midada optimads.

La realisaziun da Retica30 e da Retica30+ vegn fatga en etappas fin l'onn d'urari 2035. Per realisar las extensiuns da l'urari da tact sin la rait da viafier dovri bleras adattaziuns da l'infrastructura ed investiziuns en nov material rullant modern.

Il traffic public en il chantun Grischun è ina stretga rait da differents meds da transport cumplementars. Lingias da bus rendan accessibels ils territoris senza trajects da viafier, servan sco med da transport fin als trajects da viafier e garanteschan l'avertura detagliada. Sin las pli impurtantas lingias da bus duai perquai er vegnir introducì il tact da mes'ura.