Post d'execuziun e d'infurmaziun

Cumpetenza per la concessiun da la permissiun

Per il 1. da schaner 2003 è vegnida messa en vigur la lescha federala davart il commerzi ambulant. Dapi quel termin valan en l'entira Svizra las medemas disposiziuns legalas.

La permissiun vegn consegnada en furma d'in document. Ella è persunala, intransferibla e normalmain valaivla per tschintg onns, e quai en l'entira Svizra. Ella custa 250.00 francs.

Interpresas cun sedia en il chantun Grischun u persunas cun in'activitad da gudogn independenta cun domicil en il chantun dumondan lur permissiun tar l'uffizi da migraziun e da dretg civil dal Grischun, center da documents d‘identitad, Gäuggelistrasse 7, Postfach 9, 7001 Chur.

L'obligaziun da dumandar ina permissiun pertutga:

• persunas natiralas che offreschan a persunas privatas rauba u servetschs da cumpra u d'empustaziun;
• deposits ambulants, q.v.d. venditas limitadas temporarmain ordaifer locals da vendita stabels, saja quai or al liber, en in local u or d'in vehichel;
• commerziantas u commerziants da fiera;
• manadras u manaders da circus.

Far la dumonda

Las dumondas per ina permissiun ston vegnir inoltradas:

• al chantun, en il qual la persuna che fa la dumonda u la firma, per la quala ella lavura, è inscritta en il register da commerzi;
• al chantun da domicil, sche la persuna che fa la dumonda sezza u sche la firma n'è betg inscritta en il register da commerzi;
• al chantun, en il qual persunas cun domicil a l'exteriur surpiglian per l'emprima giada in'activitad da gudogn.

Documents che ston vegnir inoltrads

Ensemen cun la proposta (DE) ston vegnir inoltrads ils suandants documents:

• duas fotografias da passaport actualas;
• in extract dal register da commerzi ch'è vegnì emess entaifer ils ultims 3 mais, e quai da quella interpresa, per la quala la persuna che fa la dumonda lavura;

ubain 

• in document d'identitad valaivel (passaport, permiss da manischar, carta d'identitad), sche la persuna che fa la dumonda u l'interpresa n'è betg inscritta en il register da commerzi;
• in extract dal register penal che n'è betg pli vegl ch'in mais;
• ina conferma da domicil betg pli veglia ch'in onn;
• tar persunas minorennas u avugadadas il consentiment en scrit da la represchentanza legala.

Excepziuns da l'obligaziun da dumandar ina permissiun

Nagina permissiun tenor il dretg federal na vegn duvrada per la vendita da:

• gasettas e revistas al liber;
• victualias ch'èn destinadas per vegnir consumadas immediat;
• products agriculs racoltads directamain sin il funs (cun excepziun da flurs).

Exceptads da l'obligaziun da dumandar ina permissiun èn medemamain:

• cumediantas e cumediants sco er musicantas e musicants ambulants;
• participantas e participants d'ina occurrenza limitada temporarmain e localmain sco in martgà, ina fiera, ina festa da citad u ina festa da vischnanca;
• participantas e participants d'ina exposiziun u d'ina fiera (p.ex. higa).