Passaports e cartas d'identitad dal center da documents d'identitad
Tgi che vul empustar in document d'identitad, sto l'emprim far ina dumonda per telefon u sur l'internet. Suenter l'examinaziun dal dretg da pudair laschar far in document d'identitad, vegn fixà in termin per registrar las datas. Tar la preschentaziun persunala en il center da documents d'identitad vegn l'identitad verifitgada ed ils vegls documents d'identitad vegnan svalitads. Las datas necessarias per pudair emetter il document d'identitad vegnan registradas. A partir da quest mument vegn il document d'identitad tramess entaifer maximalmain 10 dis da lavur.

La dumonda sur l'internet po vegnir fatga directamain sur il suandant link: Dumonda (DE)

Las petentas ed ils petents na ston betg prender cun sai fotografias, quellas vegnan fatgas al lieu senza custs supplementars en ils centers da documents d'identitad.

Las abitantas ed ils abitants dal district da la Moesa han la pussaivladad da laschar far passaports novs e cartas d'identitad a Bellinzona:

Servizio documenti d`identità
Quartiere Piazza
Via Lugano 4
6501 Bellinzona
Tel. 091 814 73 01

Cartas d'identitad sur la vischnanca da domicil
Tgi che preferescha vinavant da dumandar la carta d'identitad sur la controlla d'abitantas e d'abitants, sto sa preschentar persunalmain tar la vischnanca da domicil. Ma quai è mo pussaivel tar vischnancas ch'èn prontas d'acceptar dumondas da carta d'identitad. As infurmai tar Vossa vischnanca da domicil. Sche Vossa vischnanca da domicil n'offerescha betg pli la pussaivladad da dumandar ina carta d'identitad sur la controlla d'abitantas e d'abitants, sto quella vegnir dumandada tar in center da documents d'identitad.
 

Persunas minorennas ed avugadadas ston sa preschentar en accumpagnament da lur represchentanza legala u preschentar in consentiment en scrit da quella: Decleraziun da consentiment (DE)