En moviment e cuntent
Per che noss corp funcziunia en moda optimala e restia saun, dovra el ina quantitad minimala da moviment. Mintga pass che allontanescha da l'inactivitad corporala, er sch'el è mo pitschen, nizzegia considerablamain a la sanadad.
Umans ch'èn activs fisicamain, profitan da numerus avantatgs sco:
- dapli qualitad da vita
- meglra fitness
- bainstar psichic
- ristga pli pitschna da malsognas cardiovascularas e metabolicas
- dapli independenza
Gia activitads da mintgadi, en las qualas Vus vegnis in zic ord flad, na stuais dentant betg exnum suar, han effects positivs sin Vossa sanadad. Da quai fan part p.ex. chaminar svelt, ir cun velo, lavur da tegnairchasa e dad iert u badigliar naiv. Recumandar pon ins la cumbinaziun dal moviment da mintgadi e d'activitads sportivas sco p.ex. currer, ir svelt cun velo, nudar, sautar u trenament cardiovascular cun urdains da fitness. Forsa prendais Vus er in pau pli patgific e preferis yoga u tai-chi. La dretga furma da moviment per Vus è en emprima lingia quel moviment che As fa plaschair e che Vus pratitgais regularmain. Empruvai differentas purschidas da moviment – i vala la paina.
Bun da savair
Persunas ch'eran fin ussa inactivas s'avischinan al stadi da sanadad da persunas activas, uschespert ch'ellas surventschan lur inactivitad e sa movan regularmain. Per in'activitad fisica n'èsi mai memia tard. Er persunas creschidas pli veglias cun problems da sanadad u cun impediments profitan dal moviment regular. Eventualmain èsi raschunaivel da laschar giuditgar in medi davart il gener e l'intensitad dal moviment.