Star segir en pe, chaminar segir
En la vegliadetgna sa reduceschan la massa musculara e la sveltezza da la reacziun e per intginas persunas èsi pli grev da mantegnair l'equiliber. Uschia s'augmenta il privel da cupitgar. La buna novitad è: cun in trenament fisic e mental pon ins reducir cleramain la ristga da crudar.
In trenament regular na rinforza betg mo la stabilitad e l'equiliber, mabain promova a medem temp il bainstar e la qualitad da viver. Activitads da mintgadi sco muntar stgalas u nettegiar pon vegnir fatgas en moda segira e stabila e l'independenza vegn mantegnida pli ditg. Vus pudais pia promover activamain Vossa mobilitad e Vossa independenza en la vegliadetgna.
Sin «sichergehen.ch» chattais Vus en moda simpla e svelta curs e purschidas per in trenament en Vossa vischinanza. Il label da qualitad «sichergehen» premiescha curs e purschidas cun in effect preventiv cunter crudar. Guardai gist ina giada lien: sichergehen.ch
Test da moviment
Quant ferma u ferm essas Vus? E co èsi cun Voss equiliber e cun Vossa dinamica? Cun il questiunari da «sichergehen» valitais Vus l'emprim Vus sezza u Vus sez. Ils exercizis appartegnents mettan silsuenter a la prova la forza, l'equiliber e la dinamica. La finala survegnis Vus in program individual da trenament. Faschai ussa il test da moviment: sichergehen.ch
Trenar correctamain
Plain schlantsch en la vegliadetgna: Per restar saun ed activ uschè ditg sco pussaivel, èn centrals il moviment quotidian ed in trenament cardiovascular. Cumplementarmain As gida da trenar la forza da las chommas, l'equiliber e la fitness mentala, per restar independent en la vegliadetgna. Mantegnai la ballantscha cun ils tips per in trenament efficazi. Empruvai er activitads che resguardan aspects socials, sco per exempel sautar, tai-chi u ritmica.
Agid supplementar
Ina buna attenziun augmenta la capacitad da reagir e gida – sco in nutriment adattà a la vegliadetgna – supplementarmain a reducir marcantamain la ristga da crudar. Ulteriuras mesiras preventivas èn tests regulars da la vesida e da l'udida tar il medi, la controlla d'eventuals effects secundars nungiavischads da medicaments sco er la controlla, sch'i dat lieus da stgarpitsch en l'abitaziun ed en ils conturns.
Publicaziuns e links