Prevenziun da dependenzas
Dependenza po tutgar mintgin – prevenziun protegia. Ir enturn conscientamain cun alcohol, nicotin, medias digitalas u gieus da fortuna protegia Vossa sanadad e Voss bainesser. Qua chattais Vus infurmaziuns fundadas, tips pratics e sustegn per identifitgar a temp las ristgas e per promover alternativas saunas.
Ina gronda part da la populaziun en Svizra consumescha substanzas legalas sco alcohol, tubac u medicaments, dovra l'internet u sa participescha a gieus da fortuna, senza periclitar sasez ed auters. Intginas persunas s'exponan dentant a ristgas u perdan la controlla davart lur consum u davart lur cumportament. I po resultar ina dependenza che chaschuna bleras suffrientschas per las persunas pertutgadas e per lur confamigliars.
suchtschweiz.ch cuntegna tut las infurmaziuns davart substanzas psicoactivas e davart modas da cumportament cun in potenzial da dependenza. Tranter auter chattais Vus mussavias per geniturs sco er infurmaziuns per persunas pertutgadas, per persunas da confidenza e per patrunas e patruns. Er cifras e fatgs davart las diversas substanzas e davart ils cumportaments ch'ellas provocheschan, èn da chattar sin la pagina d'internet.
Cussegls ed agid
Faschais Vus quitads, perquai che Vus u ina persuna da confidenza avais in problem cun in med enivrant, cun gieus da fortuna u cun il diever da l'internet? Ils posts chantunals da cussegliaziun per dumondas da dependenza porschan sustegn:
Servetsch social per dumondas da dependenza: Cussegliaziun per persunas cun in consum problematic da substanzas u cun cumportaments da dependenza sco er per lur confamigliars.
Cussegliaziun spezialisada da dependenza per persunas che consumeschan e per lur confamigliars, inclusiv uras da consultaziun specificas per persunas che consumeschan cocain u cannabis.
Cussegliaziun e sustegn tar problems d'alcohol sco er activitads en connex cun prevenziun da dependenzas, cun cussegliaziun e cun integraziun.
Links
