Export

Avais Vus vendì Voss auto a l'exteriur?

Per transferir il vehichel duvrais Vus numers d'immatriculaziun per l'export sco er in document dal vehichel da durada limitada.

Disposiziuns d'admissiun

Il document dal vehichel vegn limità sin la fin dal mais d'immatriculaziun. Sch'il mais dura mo pli 4 dis chalendars u damain, po la possessura u il possessur dal vehichel dumandar in'extensiun da la limitaziun fin la fin dal mais suandant. La valaivladad na dastga dentant mai surpassar 35 dis chalendars.

Autras prolungaziuns da la valaivladad ed admissiuns repetidas per il medem vehichel n'èn betg pussaivlas. Er midadas da vehichel n'èn betg permessas per quests numers d'immatriculaziun limitads.

La segirezza da menaschi d'in vehichel cun numers d'export sto vegnir confermàda tras ina garascha cun numers d'immatriculaziun grischuns cun in U, sche l'ultima examinaziun dal vehichel è stada suandantamain:

Vehichels cun emprima messa en circulaziun fin a 6 onns:                    nagina examinaziun

Vehichels cun emprima messa en circulaziun tranter 6 e 9 onns:          davosa examinaziun betg pli che 3 onns

Vehichels cun emprima messa en circulaziun sur 9 onns:                     davosa examinaziun betg pli che 2 onns 

Premias d'assicuranza, taglias da traffic e taxas per l'export

 La possessura u il possessur d'in vehichel che giavischa ina immatriculaziun provisorica per exportar ses vehichel po sa participar a l'assicuranza collectiva chantunala da responsabladad.

Avant che retschaiver il document dal vehichel ed ils numers d'immatriculaziun ston vegnir pajadas

• la premia d'assicuranza (che sa drizza tenor las tariffas che ans vegnan mintgamai messas a quint da la societad d'assicuranza)

• la taglia da traffic ch'è decisiva per il tip da vehichel respectiv, ed eventualmain la taxa sin il traffic da camiuns pesants sco er

• las taxas per il document dal vehichel, per ils numers d'immatriculaziun e per ina carta internaziunala d'assicuranzas (carta verda)

A partir dal 1. da zercladur 2023: midada tar ils numers d'export

Tar l'Uffizi per il traffic sin via dal Grischun survegnis Vus in numer d'export, sch'il champ 15 en il document dal vehichel cuntegna «GR» (chantun Grischun) davant il numer. Sch'in auter chantun figurescha en il champ 15, stoi vegnir cumprovà cun il contract da cumpra, ch'il vehichel è vegnì cumprà tar in commerziant dal Grischun.

Guardar fegl d'infurmaziun Midada tar ils numers d'export

Import

Vulais Vus cumprar Voss vehichel nov a l'exteriur u turnais Vus en Svizra suenter ina dimora pli lunga a l'exteriur?

Quai stuais Vus resguardar