Contribuziuns da maternitad
Las mammas ed ils babs cun entradas bassas che vulessan tgirar persunalmain lur uffant, pon dumandar contribuziuns da maternitad. Las contribuziuns da maternitad vegnan pajadas per regla durant diesch mais suenter la naschientscha.
Tgi ha il dretg da survegnir contribuziuns da maternitad?
Suenter la naschientscha d'in uffant ha la mamma u il bab il dretg da survegnir contribuziuns da maternitad, sche:
- il genitur che tgira l'uffant viva ensemen cun l'uffant en la medema chasada,
- ils bains necessaris per viver na vegnan betg cuvrids da las entradas imputablas,
- il genitur che tgira l'uffant ha il domicil da dretg civil en il chantun e viva effectivamain qua,
- l'activitad da gudogn dal genitur che tgira l'uffant na surpassa betg in mez pensum da lavur,
- e la facultad netta tenor la lescha chantunala da taglia na surpassa betg il dubel da l'import da facultad liber da taglia tar la AVS e tar la AI per persunas che vivan sulettas e per conjugals.
Fin cura sto la dumonda vegnir inoltrada?
La dumonda sto vegnir inoltrada fin il pli tard 3 mais suenter ch'il dretg ha cumenzà.
Tgi n'ha betg il dretg da survegnir contribuziuns da maternitad?
Fugitivas e fugitivs renconuschids ch'èn suttamess a la cumpetenza da sustegn da la confederaziun, persunas ch'èn admessas provisoricamain sco er requirentas e requirents d'asil n'han betg il dretg sin contribuziuns da maternitad.
En tge dimensiun e quant ditg vegnan pajadas ora contribuziuns da maternitad?
Las contribuziuns pajadas correspundan a la differenza tranter ils bains necessaris per viver e las entradas imputablas. Las contribuziuns vegnan pajadas per regla durant diesch mais suenter la naschientscha. En cas da direzza pon las contribuziuns vegnir pajadas per maximalmain quindesch mais. Il pajament ha lieu mintga mais.
Ston las contribuziuns da maternitad vegnir restituidas?
Las contribuziuns da maternitad ch'èn vegnidas retratgas legalmain na ston betg vegnir restituidas e n'èn er betg suttamessas a la taglia.
Contribuziuns ch'èn vegnidas retratgas illegalmain ston vegnir restituidas.
Annunzia e cussegliaziun
Ils servetschs socials regiunals èn cumpetents per examinar e per annunziar contribuziuns da maternitad. Avais Vus dumondas? Fixai in termin da cussegliaziun. As drizzai per plaschair al servetsch social regiunal da Vossa regiun.
Survista dals servetschs socials regiunals en il chantun Grischun