Sch'in genitur n'ademplescha betg u betg a temp sia obligaziun da mantegniment, pudais Vus u Vossa represchentanza legala As drizzar a Vossa vischnanca da domicil. Sin dumonda po Vossa vischnanca da domicil pajar anticipadamain las contribuziuns da mantegniment ed As cussegliar ed As sustegnair tar las stentas d'incassament.

Las contribuziuns da mantegniment per conjugals na vegnan betg pajadas anticipadamain.

Documents per il pajament anticipà d'aliments

Formulars per il pajament anticipà d'aliments a partir dal 2025 (mo per tudestg)

Formulars per il pajament anticipà d'aliments enfin 2024 (mo per tudestg)

Cura exista il dretg sin il pajament anticipà d'aliments?

Per il pajament anticipà da contribuziuns da mantegniment per uffants sto esser avant maun ina decisiun giudiziala u in contract approvà da l'autoritad per la protecziun d'uffants e da creschids. Questa decisiun resp. quest contract fixescha la contribuziun da mantegniment. Ultra da quai na dastgan – ensemen cun las contribuziuns da mantegniment pajadas anticipadamain – betg vegnir surpassadas las suandantas limitas d'entrada:

• Tar il genitur senza obligaziun che viva sulet: In'entrada annuala da 46 814 francs plus 7 802 francs per mintga uffant supplementar cun dretg da mantegniment
• Tar il genitur senza obligaziun maridà u che viva en ina relaziun sumeglianta ad ina lètg: In'entrada annuala netta (incl. entrada dal partenari) da 62 419 francs plus 7 802 francs per mintga uffant supplementar cun dretg da mantegniment 
• Tar la mesa orfna u il mez orfen: In'entrada annuala netta da 15 605 francs

L'import da facultad liber da taglia

L'import da facultad liber da taglia (facultad netta) è 78 024 francs. Ils imports che surpassan quest import liber da taglia vegnan attribuids per in dieschavel a las entradas.

Cura n'exista nagin dretg sin il pajament anticipà d'aliments?

I n'exista nagin dretg sin il pajament anticipà d'aliments, sche:

• i po vegnir spetgà da l'uffant ch'el finanzieschia ses mantegniment or d'agen gudogn u or d'agens meds finanzials;
• ils geniturs abiteschan ensemen;
• las infurmaziuns necessarias vegnan refusadas;
• l'uffant ha dimora permanenta a l'exteriur;
• la debitura u il debitur d'aliments ha dimora permanenta a l'exteriur e l'uffant n'ha betg ina permissiun da domicil.

Tge summa vegn pajada anticipadamain?

La vischnanca paja da princip anticipadamain la differenza tranter las limitas d'entrada e l'entrada netta fin a la contribuziun da mantegniment fixada. La contribuziun da mantegniment vegn fixada tras la decisiun giudiziala u tras il contract da mantegniment ch'è vegnì approvà da l'autoritad per la protecziun d'uffants e da creschids. La vischnanca paja anticipadamain aliments fin a l'import maximal da 764 francs per uffant e per mais.

A partir da cura datti pajaments anticipads?

La vischnanca paja anticipadamain mo las contribuziuns da mantegniment che n'èn betg scadidas dapli che 2 mais avant l'inoltraziun da la dumonda. Las contribuziuns da mantegniment vegnan pajadas anticipadamain il pli baud a partir da la data ch'igl è vegnì prendì domicil.

Poi il dretg sin contribuziuns da mantegniment er vegnir fatg valair a l'exteriur?

Sche la debitura u il debitur dals aliments viva a l'exteriur, avais Vus eventualmain la pussaivladad da far valair las contribuziuns da mantegniment a l'exteriur, e quai sur ina dumonda d'assistenza giudiziala. L'autoritad centrala per fatgs internaziunals d'aliments da l'uffizi federal da giustia è activa tar l'incassament a l'exteriur en il rom da proceduras d'assistenza giudiziala e cusseglia autoritads naziunalas ed estras sco er represchentanzas legalas privatas davart las pussaivladads existentas per far valair ils dretgs da mantegniment sin plaun transcunfinal. Ulteriuras infurmaziuns sco er ils formulars da dumonda chattais Vus sin la pagina d'internet da l'uffizi federal da giustia.

Mintga chantun ha in servetsch da recepziun e da transmissiun per l'incassament internaziunal d'aliments. Inoltrai per plaschair Vossa dumonda en trais exemplars a l'uffizi dal servetsch social chantunal.

Contact

Uffizi dal servetsch social chantunal dal Grischun

Incassament internaziunal d'aliments

Grabenstrasse 8

7001 Cuira

Incasso d'aliments

L'Ordinaziun davart l'agid a l'incasso regla l'agid ch'è da prestar da la communitad per far valair pretensiuns da mantegniment sin basa dal dretg da famiglia, sche la persuna obligada n'ademplescha betg sia obligaziun da mantegniment. Per l'agid è responsabla la suprastanza communala al domicil da la persuna che ha il dretg da survegnir prestaziuns. La suprastanza communala po incumbensar in uffizi cun l'agid d'incasso.

La persuna che ha il dretg da survegnir prestaziuns sto inoltrar ina dumonda per agid d'incasso. La dumonda po vegnir inoltrada, sche la contribuziun da mantegniment na vegn betg pajada cumplettamain, na vegn betg pajada a temp, na vegn betg pajada regularmain u na vegn insumma betg pajada. Per inoltrar la dumonda per agid d'incasso metta la suprastanza communala resp. l'uffizi a disposiziun in formular e gida a l'emplenir.

Indicaziuns e documents

Tar la dumonda per agid d'incasso tutgan las suandantas indicaziuns ed ils suandants documents:

• persunalias da la persuna che ha il dretg da survegnir prestaziuns
• titel da mantegniment (decisiun u contract da mantegniment en scrit)
• glista da las contribuziuns da mantegniment mancantas
• plainpudair d'incassar
• persunalias da la persuna che ha l'obligaziun da mantegniment
• sch'igl è enconuschent, l'adressa da la persuna che ha l'obligaziun da mantegniment e da ses patrun
• data e suttascripziun

Prestaziuns

La persuna che ha il dretg da survegnir prestaziuns renunzia – cun la dumonda per agid d'incasso – d'instradar agens pass per incassar contribuziuns da mantegniment. La suprastanza communala resp. l'uffizi s'engascha per ch'ils pajaments arrivian e porscha en spezial las suandantas prestaziuns:

• fegls d'infurmaziun per l'agid d'incasso
• discurs da cussegliaziun cun la persuna che ha il dretg da survegnir prestaziuns
• sclerir uffants maiorens davart las pussaivladads d'obtegnair ina decisiun che po vegnir exequida e da dumandar ina giurisdicziun gratuita
• calcular las contribuziuns da mantegniment mancantas resguardond in'eventuala indexaziun
• organisar e translatar il titel da mantegniment, sche quai è necessari
• eruir la persuna che ha l'obligaziun da mantegniment, sche quai è pussaivel cun lavur e custs adequats
• admonir la persuna che ha l'obligaziun da mantegniment
• instradar mesiras adattadas per l'agid d'incasso (execuziun sfurzada, arrest, obligaziun da pajament u garanzia)
• survegliar ch'il pajament entria e prender en consegna pajaments

Custs

Las prestaziuns per l'agid d'incasso da las contribuziuns da mantegniment a favur d'uffants èn gratuitas. Las prestaziuns per l'agid d'incasso da las contribuziuns da mantegniment a favur da creschids èn per regla medemamain gratuitas, dentant po vegnir dumandada ina participaziun als custs, sche la persuna che ha il dretg da survegnir prestaziuns ha ils meds finanzials necessaris.

Ulteriuras infurmaziuns chattais Vus en l'Ordinaziun davart l'agid a l'incasso.