En ina canorta d'uffants vegnan ils uffants da la vegliadetgna prescolara tgirads regularmain. L'assistenza po esser dividida en unitads d'in mez u d'in entir di. Ils uffants mangian ils pasts usitads durant il temp d'assistenza (marendas, gentar) en la canorta. L'assistenza serva per regla a la cumpatibilitad da la professiun cun la famiglia. Ella promova l'integraziun sociala e linguistica dals uffants sco er lur svilup en la gruppa.

En tuttas regiuns dal chantun Grischun datti canortas d'uffants. La charta virtuala dat ina survista da la purschida.

Permissiun

Per recepir uffants e giuvenils dovri ina permissiun, sch'i vegnan tgirads durant il di u la notg il medem mument quatter u dapli uffants da la vegliadetgna prescolara u scolara. L'uffizi dal servetsch social è cumpetent per conceder la permissiun. Ultra da quai ha el la surveglianza. Quai vul dir che tut las canortas d'uffants en il chantun Grischun han ina permissiun da manaschi da l'uffizi dal servetsch social. Novas purschidas pon avrir mo, sch'ellas han ina permissiun da manaschi.

L'uffizi dal servetsch social conceda resp. renovescha ina permissiun da manaschi, sche las canortas observan las prescripziuns concernent las directivas da qualitad da l'uffizi dal servetsch social. Las directivas da qualitad cumpletteschan l'ordinaziun federala davart il plazzament d'uffants per la tgira e l'adopziun sco er la lescha davart ils uffants confidads dal chantun Grischun.

Documents da permissiun

Directivas da qualitad per canortas d'uffants pitschens / centers dal di per uffants en il chantun Grischun

Raster da permissiun da manaschi per canortas d'uffants pitschens / centers dal di per uffants en il chantun Grischun (mo per tudestg)

Persunas spezialisadas en il sectur da las canortas d'uffants

Perfecziunaments per la direcziun da canortas d'uffants

Attest dal medi per la direcziun da canortas d'uffants (mo per tudestg)

Finanziaziun

En il chantun Grischun vegnan las canortas d'uffants finanziadas tras contribuziuns dals geniturs, tras donaziuns sco er tras contribuziuns dal chantun e da las vischnancas. Las contribuziuns sa basan sin ina tariffa dals custs normads per unitad d'assistenza, che vegn fixada da la regenza dal chantun Grischun. Per tut las instituziuns vala la medema tariffa. Las suandantas purschidas survegnan contribuziuns chantunalas e communalas.

• Purschidas da tgira per uffants da la vegliadetgna prescolara (p.ex. canortas d'uffants, uniuns da geniturs da di)
• Purschidas d'assistenza per uffants da scola durant las vacanzas da scola

Actualmain sustegnan il chantun e las vischnancas novas purschidas durant ils emprims 3 onns cun mintgamai 25 pertschient dals custs normads e purschidas existentas cun mintgamai 20 pertschient. Las premissas las pli impurtantas per survegnir contribuziuns èn:

• la purschida sto vegnir manada sin basa d'utilitad publica;
• la purschida sto correspunder a la planisaziun dal basegn da la vischnanca;
• in'assistenza suffizienta e qualifitgada sto vegnir garantida, e quai en localitads ch'èn adattadas per quai;
• las tariffas ston vegnir graduadas tenor la capacitad economica da las persunas cun la pussanza dals geniturs.

Agids finanzials da la confederaziun

La confederaziun sustegna instituziuns d'assistenza cun contribuziuns per installar, per extender la purschida sco er per coordinar l'assistenza en famiglias da di. Infurmaziuns pli detagliadas chattais Vus sin la pagina d'internet da l'uffizi federal d'assicuranzas socialas (UFAS).

Documents

Dumonda per la renconuschientscha da la contribuziun (canortas d'uffants / uniuns da geniturs da di)

Finanziaziun: Annunzia pesteriura da basegn (canortas d'uffants / uniuns da geniturs da di)

Ordinaziun davart la finanziaziun extraordinaria da la tgira d'uffants cumplementara a la famiglia en il chantun Grischun pervia dal coronavirus