Uffants e giuvenils che na vivan betg tar lur geniturs dovran ina protecziun e promoziun speziala. Las famiglias da tgira porschan ina tgira che promova lur svilup e la stima. Perquai ston geniturs da tgira avair las resursas persunalas, socialas ed educativas necessarias per tgirar in uffant confidà.

En il chantun Grischun è l'uffizi dal servetsch social cumpetent per conceder la permissiun e per survegliar relaziuns da tgira en famiglias cun uffants e giuvenils svizzers ed esters. Ultra da quai cusseglia l'uffizi dal servetsch social geniturs da tgira, als infurmescha davart lur incumbensas, lur dretgs e lur obligaziuns ed als sustegna cun furmaziuns supplementaras.

Noziun da la relaziun da tgira en famiglia

D'ina relaziun da tgira en famiglia sa tracti, sch'i vegnan recepids e tgirads il medem mument fin a trais uffants u giuvenils sut 18 onns durant il di e la notg.

Organisaziuns per il plazzament d'uffants en famiglias (OPUF)

Las organisaziuns per il plazzament d'uffants en famiglias adempleschan differents servetschs en il rom da la tgira en famiglia. Ellas cusseglian, accumpognan e sustegnan famiglias da tgira e porschan furmaziuns supplementaras.

Las organisaziuns per il plazzament d'uffants en famiglias, ch'èn activas en il Grischun, dovran ina permissiun da l'uffizi dal servetsch social.

As interessais Vus per la collavuraziun cun ina OPUF? As infurmai per plaschair directamain tar l'organisaziun tschernida davart sia purschida.