L'onn 2022 han ins scuvert a Salouf in deposit da plirs tocs dal temp da bronz tardiv cun in cuntegn impressiunant. Il chat è fitg interessant per chapir il Surses sco spazi da viver e sco spazi economic dal temp da bronz. El stgaffescha dentant er connexs surregiunals entaifer las Alps Centralas e sur quellas or.

L'atun 2022 han ins chattà in mantun d'objects da metal dal temp da bronz da la vart sanestra da la chavorgia dal Crap Ses (Surses) (guardar communicaziun a las medias dals 27-06-2023). En in foss han ins chattà 80 objects da bronz resp. fragments da tals, cun in pais total da ca. 20 kg. Quest mantun da farclas, maneras, parts da bischutaria e da vestgadira sco er tocs da metal brut è sa mussà sco tipic «deposit», q.v.d. in lieu, nua ch'ins ha deponì intenziunadamain bains. En general correspunda la cumposiziun, il stadi e l'arranschament dals objects ad in muster fitg derasà en l'Europa. Cun sia apparientscha sa metta il deposit da Salouf-Vostga bain en retscha cun ils exemplars dal territori vest da las Alps Orientalas.

Il chat è extraordinari, perquai ch'i dat relativamain paucs deposits da plirs tocs dal temp da bronz. Il deposit da Salouf-Vostga è pia in ulteriur chat da gronda muntada per l'enconuschent inventari da la regiun gronda.

Il deposit da Salouf-Vostga è dentant er da fitg grond interess, perquai ch'el è vegnì documentà ed exchavà en moda pretensiusa e professiunala dal SAG. La documentaziun cumpiglia bleras infurmaziuns detagliadas ch'èn da valur per la scienza.

L'occupaziun profunda da l'archeologia e da l'analisa cun il material dal deposit chattà, cun ses cuntegn sco er cun l'ulteriur context pussibilitescha ina perspectiva contemporana sin la pratica da depositar e sin il fenomen dals deposits dal temp da bronz. Plinavant empermetta ella da furnir ina contribuziun decisiva per chapir la regiun e sia impurtanza sociala sco er economica. En quest connex sto il deposit vegnir discutà en il context da la producziun da metal sco er da las raits regiunalas e surregiunalas, e betg sco ultim er sut l'aspect da l'imaginaziun spiertala. La finala stattan en il center las dumondas davart il motiv per sutterrar objects (pertge?) e davart ils acturs (tgi?).

Salouf-Vostga. Il deposit durant sia scuverta l'october 2022. Ins vesa duas farclas, ina manera sco er tocs culads. Tut en tut cuntegna il deposit 80 objects dal temp da bronz tardiv. 

Dapli informaziuns

Models tridimensiunals dals objects
Artitgel davart il chat – Archeologia Svizra

Contacts

Ariane Ballmer
Christoph Baur
Leandra Reitmaier-Naef