En l'archeologia ed en la tgira da monuments ha la documentaziun fotografica ina gronda impurtanza. Ultra da plans èn las fotografias ils unics documents, sin ils quals ils resultats d'exchavaziuns e da monuments architectonics restan archivads visualmain suenter che intervenziuns architectonicas u la decadenza natirala han eliminà per adina ils fastizs d'epocas passadas. Per registraziuns da ruinas, da cumplexs d'edifizis, d'abitadis u d'entiras parts da territoris èn fotografias ord la perspectiva d'utschè da gronda valur.

Dapi blers onns ha er il Servetsch archeologic dal Grischun atgnas dronas (UAV, unmanned aerial vehicle). Equipadas cun apparats da fotografar digitals permettan ellas da documentar e da registrar il stadi da gronds objects betg accessibels.

Models tridimensiunals
Cun las novas tecnologias na fan ins ozendi dentant betg mo ina simpla fotografia bidimensiunala da l'object. Cun agid da la fotogrammetria pon ins reconstruir e conservar entirs edifizis u entiras parts da territoris ed er pitschens chats sco models digitals, interactivs tridimensiunals. Ils models digitals e la diversitad da lur represchentaziun visuala èn instruments impurtants per identifitgar e per documentar differentas structuras. Nus ans stentain da render accessibels libramain al public uschè blers da noss models tridimensiunals sco pussaivel. Sin la plattafurma Sketchfab pon persunas interessadas interagir virtualmain cun objects da tut il chantun. Quai èn tant objects da paucs decimeters diameter fin objects cun ina dimensiun da passa in kilometer quadrat.

 
Natiralmain vegnan nossas dronas utilisadas exclusivamain da persunas spezialisadas scoladas ed observond las regulaziuns legalas e tut las mesiras da segirezza necessarias.

Contact
Christoph Baur


Sketchfab models