Metter objects sut protecziun chantunala e federala sin fundament da subvenziuns

Sch'i vegnan pajadas subvenziuns da passa 25 000 francs, ha quai per consequenza sin plaun chantunal che l'object respectiv vegn mess formalmain sut protecziun. La confederaziun metta formalmain objects sut protecziun, uschespert ch'els vegnan subvenziunads. Sch'in object vegn mess sut protecziun, vegn inscritta ina restricziun da dretg public da la proprietad en il register funsil. Per las proprietarias ed ils proprietaris respectivs e per lur successurs legals vul quai dir ch'els stoppian:

• preservar l'object uschenavant sco pretendibel da donns u da perdita sco er da destrucziun e prender las mesiras necessarias per ses mantegniment;
• tolerar – sin annunzia – l'inspecziun e las retschertgas necessarias da l'object tras la tgira da monuments u tras persunas spezialisadas che vegnan incumbensadas da tala;
• laschar permetter il chantun intervenziuns u midadas vi dal stadi da l'object (art. 29 LNPGR);
• dumandar il consentiment da la tgira da monuments dal Grischun er per midadas dal stadi da l'object che na dovran betg ina dumonda da construcziun;
• observar las directivas da la tgira da monuments.    

Metter facultativamain objects sut protecziun
Sin giavisch da las proprietarias e dals proprietaris po in edifizi vegnir mess formalmain sut protecziun er independentamain da contribuziuns dal maun public. Sco basa serva in inventari d'edifizis che motivescha la dignitad da protecziun e che inditgescha la dimensiun da la protecziun da l'object. Cun agid da questa mesira po vegnir sustegnì a vista pli lunga il mantegniment cumplain d'edifizis degns da vegnir protegids.

ONPGR – Ordinaziun chantunala davart la protecziun da la natira e da la patria