Sa basond sin la lescha chantunala davart la protecziun da la natira e da la patria (art. 4, 6 e 25 LNPGR) e sin la lescha chantunala davart la planisaziun dal territori (art. 43 e 74 LPTGR) maina il chantun Grischun in inventari dals edifizis singuls, da las gruppas d'edifizis e dals maletgs da lieus degns da vegnir protegids. Quest inventari vegn elavurà da la tgira da monuments en tut las vischnancas dal chantun. A las vischnancas ed al chantun serva el sco basa per tractar il patrimoni cultural architectonic. L'inventari n'è betg definitiv, mabain po vegnir cumplettà e rectifitgà periodicamain sin fundament da novas enconuschientschas scientificas.

L'inventari chantunal vegn elavurà en dus pass. La prioritad ha l'elavuraziun d'ina glista da survista d'objects potenzialmain degns da vegnir protegids (glista d'inventari). En in segund pass – che resulta per motivs concrets, sco per exempel ina restauraziun planisada u ina midada da construcziun previsa – vegn perscrutà e documentà detagliadamain il singul object, per survegnir tschertezza davart sia valur da protecziun (inventari d'edifizis). En cas ch'in suspect da protecziun vegn confermà, na cuntegnan inventaris d'edifizis betg mo ina documentaziun areguard l'istorgia d'art ed areguard l'istorgia da l'architectura, mabain er ina motivaziun per la protecziun e la dimensiun da la protecziun. Els servan sco basa per elavurar projects da construcziun che tangheschan edifizis singuls degns da vegnir protegids. La glista d'inventari ed ils inventaris d'edifizis furman ensemen l'inventari chantunal ch'è prescrit tras lescha.

Dumondas frequentas tar la glista d'inventari

Fegl d'infurmaziun tar la glista d'inventari

Glista d'inventari en il SIG