La Chanzlia chantunala sa chapescha sco purschidra da servetschs per l'administraziun chantunala e per la publicitad. Ella è il post da stab general da la Regenza e dal Cussegl grond. La Chanzlia chantunala pussibilitescha a la Regenza ed al parlament d'ademplir lur incumbensas da maniera cunvegnenta, cun cleras finamiras ed en moda transparenta per la publicitad. Ella procura che las burgaisas ed ils burgais possian far diever facilmain da lur dretgs politics. Per garantir in servetsch optimal a la clientella metta la Chanzlia chantunala a disposiziun a l'administraziun las prestaziuns centralas necessarias.
Planisaziun e controlling
Il sectur Planisaziun e controlling sustegna la Regenza en las planisaziuns politicas e procura per il controlling correspundent. Ils instruments da planisaziun ils pli impurtants èn il program da la Regenza ed il program annual.
Communicaziun
Il Servetsch da communicaziun procura ch'ils conclus da la Regenza vegnian communitgads svelt e cumplettamain a la publicitad ed a las medias. Il Servetsch da communicaziun sustegna medemamain ils departaments ed ils posts da servetsch tar l'infurmaziun da las medias e da la publicitad.
Ulteriuras infurmaziuns chattais Vus sin la pagina da news da l'administraziun chantunala.
Relaziuns externas
Il sectur Relaziuns externas procura che las relaziuns externas dal chantun vegnian tgiradas ed extendidas. El è il post da contact per ils servetschs centrals da la Confederaziun e dals chantuns sco er da las regiuns vischinas a l'exteriur.
Dapli infurmaziuns chattais Vus sin la pagina Relaziuns externas.
Dretgs politics e publicaziuns
Il sectur Dretgs politics è responsabel per l'ediziun da las publicaziuns dal chantun. El procura er per in proceder correct da las votaziuns, da las elecziuns e da la communicaziun dals resultats.
Tar il sectur dals Dretgs politics datti la pussaivladad d'absolver in praticum giuridic.
Ulteriuras infurmaziuns chattais Vus sin la pagina Dretgs politics.
Translaziuns
Il Servetsch da translaziuns procura ch'ils documents dal chantun vegnian translatads en las linguas uffizialas chantunalas rumantsch, tudestg e talian. Il Servetsch da translaziuns stat a disposiziun al Cussegl grond, a la Regenza ed a la Chanzlia chantunala sco er a l'ulteriura administraziun chantunala.
Centrala per stampats e material
La Centrala per stampats e material (CSM) s'occupa dals stampats da l'administraziun chantunala e procura per ina concepziun unitara dals documents stampads. Ultra da quai proveda ella l'administraziun chantunala ed autras instituziuns cun material e cun apparats da biro funcziunals. Las empustaziuns pon vegnir fatgas directamain en il shop online.
Ulteriuras infurmaziuns chattais Vus sin la pagina da la CSM.
Post spezialisà per il princip da transparenza
Sco post da cumpetenza cusseglia e gida il «Post spezialisà per il princip da transparenza» ils organs publics da l'administraziun chantunala ad exequir la Lescha da transparenza. Ultra da quai è el il post d'infurmaziun per dumondas generalas externas.
Ulteriuras infurmaziuns chattais Vus sin la pagina dal Post spezialisà per il princip da transparenza.
Secretariat dal Cussegl grond
Il Secretariat dal Cussegl grond stat a disposiziun als organs dal Cussegl grond sco er a las singulas deputadas ed als singuls deputads per liquidar lur lavur parlamentara.
Manual per las tractativas en il Cussegl grond
Ulteriuras infurmaziuns chattais Vus sin la pagina dal Cussegl grond.