Il program da la Regenza ed il plan da finanzas èn tenor l'art. 42 al. 2 e tenor l'art. 46 da la Constituziun dal chantun Grischun (Constituziun chantunala, CC; DG 110.100) ils instruments centrals per diriger strategicamain e politicamain il chantun Grischun. Ensemen furman els la planisaziun da prioritads a vista mesauna da la Regenza. Il program da la Regenza circumscriva las finamiras e las activitads las pli impurtantas da la Regenza per ina perioda da planisaziun da 4 onns. En concordanza cun il program da la Regenza en quai che concerna il temp ed il cuntegn fixescha la Regenza las finamiras e las directivas da la politica da finanzas. Il plan da finanzas mussa il svilup probabel da las finanzas chantunalas durant la medema perioda da planisaziun.
Program da la Regenza 2021–2024
Program da la Regenza 2021–2024
Il program da la Regenza 2021–2024 sa focussescha sin ils suandants elements centrals:
Cun quests elements centrals vuless la Regenza primo posiziunar meglier il chantun Grischun sco chantun da muntogna innovativ e l'orientar vers l'avegnir digital, secundo sviluppar il Grischun cun in green deal en moda duraivla en temps da la midada dal clima e terzio promover la diversitad dal Grischun.
Sin basa da quests trais elements centrals surordinads ha la Regenza fixà en il rom dal program da la Regenza 2021–2024 tut en tut 12 finamiras e 29 puncts centrals da svilup cun 98 mesiras. Cun questas finamiras e mesiras vuless la Regenza rinforzar duraivlamain il chantun Grischun sco lieu attractiv per viver, per lavurar, per l'economia, per la furmaziun e sco territori natiral. Il Grischun duai trair a niz e commerzialisar meglier sias fermezzas e ses avantatgs economics sco chantun da muntogna en ina cuntrada cultivada e natirala intacta, cun ina gronda diversitad culturala e linguistica, cun taglias moderadas e cun servetschs excellents sco er cun ina gronda purschida culturala e da temp liber. A las sfidas las pli impurtantas duai vegnir fatg frunt cun mesiras concretas, e quai en ils secturs centrals che la grafica qua sutvart mussa.
Program da la Regenza 2025–2028
Program da la Regenza 2025–2028
En il focus dal program da la Regenza 2025–2028 stattan ils suandants puncts centrals:
Il program da la Regenza 2025–2028 ha la finamira da concepir il svilup dal chantun Grischun en blers reguards da maniera positiva sco er en il senn da la populaziun e da las interpresas. En quest connex vuless la Regenza dar paisa als suandants puncts centrals: 1. manar il Grischun vers l'avegnir digital, 2. meglierar cuntinuadamain las cundiziuns generalas per viver e lavurar en il chantun, 3. sviluppar en moda persistenta il Grischun cun in green deal en temps da la midada dal clima e 4. augmentar sistematicamain l'attractivitad da noss chantun da valur vitala.
Sin basa da quests quatter puncts centrals surordinads ha la Regenza definì – en il rom dal program da la Regenza 2025–2028 – tut en tut 11 finamiras e 30 puncts centrals da svilup cun 87 mesiras appartegnentas. Cun questas finamiras e mesiras vul la Regenza augmentar sistematicamain l'attractivitad dal chantun Grischun sco lieu per viver e lavurar e prender las dretgas decisiuns, per ch'il chantun Grischun possia er vinavant sa sviluppar en moda prosperaivla.
La suandanta survista grafica mussa ils quatter puncts centrals e las intenziuns respectivas da la Regenza.
