Cun mesiras per quietar il traffic duai il traffic sin via vegnir reglà en moda pli supportabla. Latiers tutgan per exempel mesiras sco la reducziun da limitas da tempo e la revalitaziun da spazis stradals tras mesiras architectonicas. Questas mesiras tangheschan er il traffic public sin via: Savens procuran quellas per ina reducziun da la sveltezza media. Las prolungaziuns dal temp da viadi che resultan da quai pon chaschunar retards, che las colliaziuns na vegnan betg garantidas e la finala custs da manaschi pli auts, perquai ch'igl è necessari da clamar en acziun bus supplementars.

Betg sco ultim vegn er reducì il confort da viagiar, perquai ch'i vegn savens franà e partì da nov. Sch'i vegnan realisadas talas mesiras sin trajects da via che vegnan duvrads dal traffic public, stoi vegnir resguardà stringentamain, che las mesiras per quietar il traffic vegnian realisadas «en moda favuraivla per ils bus», q.v.d. ch'ils bus na vegnian sche pussaivel betg franads da precedenzas da dretga, d'elements che quieteschan il traffic e.u.v. Differentas mesiras gidan ad evitar las perditas da temp: Corridors per il traffic public cun reglas da precedenza adattadas senza restricziuns architectonicas, in management dal traffic per impedir colonnas, la concepziun da las fermadas per diriger ils bus sco emprim en la colonna, acceleraziuns en puncts centrals dal traffic u in agen trassé.

Ulteriuras infurmaziuns chattan ins en il studi «Wie funktioniert der ÖV bei Tempo 30? Empfehlungen für einen attraktiven öffentlichen Verkehr» da l'Associaziun Traffic ed Ambient da la Svizra.
 
Wie funktioniert der ÖV bei Tempo 30? (mo per tudestg)