Las zonas da repaus per la selvaschina pudais Vus stgargiar directamain da l'internet sin Voss GPS persunal (www.geo.gr.ch > Geodaten > Geodatenkatalog > WRZ > GPS-Daten (nagina URL).
Ils guauds e la pastgira èn accessibels libramain en Svizra. Quest dretg po vegnir restrenschì en il chantun Grischun cun zonas da repaus per la selvaschina, zonas per la protecziun da la natira, zonas per la protecziun da la selvaschina e dal guaud, etc. per evitar conflicts tranter l'uman, ils animals e l'ambient.
La natira è il spazi da viver da bleras spezias d'animals e da plantas. Blers animals èn s'adattads sur in lung temp a las diras cundiziuns da l'enviern. Durant quest temp criv e privlus cumbattan els di per di per surviver. Els ston chattar avunda pavel e sa mover uschè pauc sco pussaivel per schanegiar lur reservas.
L'uman tira a niz adina pli intensivamain quest spazi da viver, uschia che quel sa reducescha e sa fragmentescha adina dapli per ils animals selvadis. Perquai èsi fitg impurtant da laschar als animals zonas, nua ch'els pon sa retrair e passentar l'enviern senza disturbis. Talas restricziuns temporalas e localas stattan dentant en cuntradicziun cun il dretg fundamental d'avair access liber als guauds ed a la pastgira e dovran perquai ina basa legala.
Tge meds legals stattan a disposiziun?
La Confederaziun dispona da l'Ordinaziun davart ils asils federals da selvaschina (OAFS), da l'Ordinaziun davart ils reservats d'utschels da l'aua e d'utschels migrants d'impurtanza internaziunala e naziunala (ORUAM) e da la Lescha dal Parc Naziunal. La Lescha federala davart la chatscha e la protecziun dals mamifers e dals utschels selvadis (LChP) ed era la Lescha federala davart il guaud (LG) èn las basas legalas che autoriseschan ils chantuns da relaschar disposiziuns per proteger ils animals selvadis cunter disturbis.
A basa da la Lescha chantunala da chatscha (art. 27) pon las vischnancas grischunas limitar localmain e temporalmain l'access als territoris, nua che la selvaschina passenta l'enviern, e determinar quai en la planisaziun d'utilisaziun.
Las zonas da repaus per la selvaschina valan per gronda part en il chantun Grischun durant il mez onn d'enviern. Malgrà ch'ellas valan per in e scadin, sa drizzan ellas surtut a sportist:as d'enviern e turist:as d'enviern sco er a chatschad:ras che tschertgan a partir dal favrer cornas da tschiervs bittadas giu. Ultra da quai ha il chantun Grischun relaschà a basa da cunvegnas zonas cun restricziuns da sgol per parasgulad:ras e pilot:as da delta.
Talas zonas da repaus vegnan resguardadas surtut, sch'ellas èn il resultat d'ina buna collavuraziun.
Co vegnan determinadas las zonas da repaus per la selvaschina?
Cun sviluppar e render accessibel in mapserver metta il chantun Grischun a disposiziun novas tecnologias da communicaziun pli effizientas. Sin la pagina-web wildruhe.gr.ch pon las burgaisas ed ils burgais s'infurmar ordavant detagliadamain davart las regulaziuns existentas en il territori da lur tura u excursiun. Uschia survegnan tuts ina survista da las zonas da repaus per la selvaschina cun vigur legala. En pli pon ins era s'infurmar davart las zonas fixadas a basa d'ina recumandaziun e d'ina cunvegna cun differents circuls d'interess (pendicularas, chatschad:ras, guardiaselvaschinas, cirquits forestals, etc.).
Co m'infurmesch jau davart las zonas da repaus per la selvaschina?
Cun sviluppar e render accessibel in mapserver metta il chantun Grischun a disposiziun novas tecnologias da communicaziun pli effizientas. Sin la pagina-web wildruhe.gr.ch pon las burgaisas ed ils burgais s'infurmar ordavant detagliadamain davart las regulaziuns existentas en il territori da lur tura u excursiun. Uschia survegnan tuts ina survista da las zonas da repaus per la selvaschina cun vigur legala. En pli pon ins era s'infurmar davart las zonas fixadas a basa d'ina recumandaziun e d'ina cunvegna cun differents circuls d'interess (pendicularas, chatschad:ras, guardiaselvaschinas, cirquits forestals, etc.).
En il territori è la gronda part da las zonas da repaus per la selvaschina marcada a moda unitara. Tavlas da plastic cun extracts da chartas vegnan plazzadas per sendas e puncts da rimnada, lieus impurtants en il territori vegnan marcads cun bindels da plastic elastics e colurads verd-alv. Questas marcaziuns ston vegnir realisadas uschia ch'ellas infurmeschan ils umans senza impedir u periclitar ils animals selvadis.
Tut en tut èn las zonas da repaus per la selvaschina sa cumprovadas en il Grischun. La populaziun e las autoritads han pudì vegnir sensibilisadas per la problematica ed ellas gidan a proteger ils quartiers d'enviern impurtants cunter disturbis mulestus.