Pervia da la gronda populaziun da selvaschina d'ungla e pervia da la fitg gronda influenza da la selvaschina sin il guaud en tschertas regiuns, sto la chatscha intervegnir vinavant sin in aut nivel en la populaziun da selvaschina d'ungla. Perquai ch'ils chavriels – e localmain er ils chamutschs – giogan ina rolla decisiva en cas da conflicts tranter il guaud e la selvaschina, vegn il squitsch da chatscha tut tenor regiun augmentà supplementarmain. Il svilup da la populaziun da tschiervs en differentas regiuns mussa, che la lavur da las chatschadras e dals chatschaders porta fritgs e che la finamira da reducziun vegn realisada pass per pass.
L'onn 2021 è l'intervenziun da chatscha tar ils tschiervs stada fitg gronda en bleras regiuns dal Grischun, quai grazia ad in grond dumber da selvaschina sajettada durant la chatscha speziala. Quai è sa mussà er tar la populaziun da primavaira ch'è vegnida reducida en l'entir chantun per ulteriurs 340 animals ad oramai 15 660 tschiervs. La reducziun ha oravant tut gì lieu en regiuns cun problems da guaud-selvaschina.
En territoris cun ina gronda preschientscha dal luf guntgeschan ils tschiervs il luf. Per quest motiv po la repartiziun da la selvaschina sa midar fermamain entaifer curt temp. Per la stimaziun da la populaziun da primavaira, per la planisaziun da prelevaziun e per la chatscha signifitga quai ina sfida supplementara. Medemamain sa mussi, che la populaziun da chavriels e tut tenor regiun er quella da chamutschs pudessan sa reducir marcantamain en las regiuns cun ina gronda preschientscha dal luf e dal luf-tscherver.
Ulteriura regulaziun consequenta da las populaziuns da selvaschina d'ungla
La populaziun da tschiervs en il chantun ha dapi ses maximum l'onn 2019 pudì vegnir reducida per 6 pertschient (960 tschiervs). Quest svilup correspunda a las finamiras da chatscha tenor la strategia concernent il «Spazi da viver guaud-selvaschina 2021» e duai vegnir cuntinuà. Uschia ston vegnir sajettads durant la chatscha da quest onn en total 5430 tschiervs (2021: 5565 tschiervs), da quels 3145 animals feminins (2021: 3177). Uschia è l'intervenziun da chatscha planisada en relaziun cun la populaziun da primavaira actuala levamain pli auta che l'onn precedent.
Pervia da la situaziun guaud-selvaschina predominanta e pervia da las grondas populaziuns en tschertas regiuns ston en differentas regiuns da guaud er vegnir sajettads dapli chavriels e chamutschs. En il rom dals rapports guaud-selvaschina regiunals vegnan definidas mesiras respectivas che vegnan realisadas en la planisaziun da la chatscha. Da l'autra vart vegn la reducziun fitg ferma da la populaziun da chavriels e quella da chamutschs en la Surselva resguardada en la planisaziun da la chatscha 2022 analogamain a l'onn precedent cun las restricziuns da chatscha correspundentas.
Intensivar la chatscha sin portgs selvadis en la Mesolcina
La populaziun da portgs selvadis en la part sut da la Mesolcina è creschida fermamain e chaschuna gronds conflicts areguard il terren cultivà. I vegnan perquai cuntinuadas differentas mesiras per evitar in ulteriur augment da la populaziun.
Planisaziun buna e premurusa da la chatscha bassa
Grazia al monitoring intensiv èsi cumprovà, che la populaziun da la selvaschina da chatscha bassa en il Grischun, en spezial da la lieur brina e dals cots e da las giaglinas da draussa, è sauna e che las spezias prospereschan anc adina fitg bain. Las prescripziuns da chatscha èn sa cumprovadas e vegnan cuntinuadas correspundentamain. Las chatschadras ed ils chatschaders èn conscients da lur responsabladad cun exequir questa chatscha e s'engaschan activamain per questas spezias cun far lavurs da tgira.