Gia per la tschintgavla giada ha l'Uffizi da chatscha e pestga pudì constatar ina reproducziun da ludras en l'Engiadina. Ina da las ludras giuvnas è per disfortuna vegnida mazzada en in accident da traffic.

Venderdi, ils 18 d'october, han utilisaders da la via annunzià ch'in animal mort giaschia en la vischinanza da Bever a l'ur da la via. La surveglianza da chatscha ha constatà ch'i sa tracta d'ina ludra. Il giuven mastgel na pasava strusch 4 kilograms ed aveva ina lunghezza dad 85 cm. Uschia è vegnì confermà quai, che vegniva supponì gia pli ditg. Las ludras en l'Engiadin'Ota han danovamain pudì sa reproducir cun success, e quai gia per la tschintgavla giada. Las ludras femellas partureschan mintgamai in fin quatter pitschens per giada. La schanza è pia gronda, che anc ulteriurs animals giuvens èn en gir en l'Engiadina.