La fin da november 2024 è vegnì registrà in singul portg selvadi d'ina trapla fotografica a Zernez. Portgs selvadis datti en il Grischun en la Mesolcina. Singuls animals chattan ins er en il Puschlav ed en la Bregaglia. Ina cumprova confermada en l'Engiadina n'hai anc mai dà.

La fin da november ha la surveglianza chantunala da chatscha survegnì d'ina persuna externa l'annunzia, ch'ina trapla fotografica haja registrà ils 26 da november 2024 in portg selvadi en il territori Val da Barcli sin stgars 1800 m s.m. Probablamain è l'animal immigrà nà dal sid sur la Bregaglia u sur Livigno. La registraziun da video mussa, ch'i sa tracta d'in animal masculin. Ils portgs selvadis masculins giuvens bandunan savens il spazi da viver oriund e pon chaminar grondas distanzas. Perquai che l'Engiadina n'è betg adattada sco spazi da viver per portgs selvadis, pon ins supponer, ch'il portg selvadi fotografà vegn ad ir vinavant. L'enviern sa nutreschan portgs selvadis principalmain da parts da plantas sutterranas sco bulbas u ragischs, da nuschs da faus, da glondas u da chastognas ch'èn crudadas giu u da restanzas da racolta. La cultivaziun dad ers datti mo fitg localmain en l'Engiadina e la quota dal guaud da feglia è fitg bassa. Plinavant è il terren schelà fermamain durant l'enviern. Quai difficultescha supplementarmain la tschertga da nutriment. Che portgs selvadis sa domicilieschan en il proxim futur en l'Engiadina è perquai pauc probabel.