Tut las requirentas ed ils requirents d'asil vegnan attribuids entaifer 72 uras suenter ch'ellas ed els han inoltrà lur dumonda, ad in center federal d'asil cun funcziuns proceduralas che la confederaziun maina en las 6 regiuns d'asil (Svizra occidentala, Svizra nordorientala, Berna, Turitg, Svizra centrala e Svizra dal sid sco er Svizra orientala). Las requirentas ed ils requirents d'asil vegnan attribuids a las regiuns proporziunalmain a la populaziun. 

Il secretariat da stadi per migraziun taidla ils motivs d'asil da las requirentas e dals requirents d'asil e decida silsuenter davart la concessiun u davart la refusa da l'asil sco er davart la spedida ord la Svizra (art. 29 LAsil). Proceduras d'asil cun disposiziuns incl. l'execuziun da la spedida en cas da proceduras tenor Dublin e da proceduras acceleradas (ca. 60 % da tut las novas dumondas d'asil) vegnan liquidadas da partir dal 1. da mars 2019 directamain en ils centers federals d'asil.

Il secretariat da stadi per migraziun attribuescha als chantuns requirentas e requirents d'asil che sa chattan en la procedura extendida. La decisiun d'attribuziun po vegnir contestada mo cun la motivaziun ch'ella violeschia il princip da l'unitad da la famiglia. L'attribuziun vegn fatga tenor il model da cumpensaziun ed importa per il chantun Grischun ca. 3 %.

Suenter la fin da la dimora en in center federal d'asil survegnan las requirentas ed ils requirents d'asil in bon da viafier per far il viadi en quel chantun, al qual ellas ed els èn vegnids attribuids. En il Grischun vegnan l'accoglientscha sco er l'attribuziun da las persunas assegnadas fatgas da l'uffizi chantunal da migraziun e da dretg civil. Quel è er responsabel per il manaschi dals alloschis collectivs.

Neustrukturierung Asyl ab 1. März 2019 (DE)

Liste der zugelassenen Rechtsberatungsstellen für das erweiterte erstinstanzliche Asylverfahren (DE)