Chaussas generalas

 

Da princip vegnan las legitimaziuns da persunas estras e da requirents d'asil emessas il pli ditg per 12 mais, dentant maximalmain fin il termin da partenza fixà.

Premissas
Durant la dimora en ils centers da la Confederaziun (CFA) na dastgan las requirentas ed ils requirents d'asil pratitgar nagina activitad da gudogn.

Requirentas e requirents d'asil en la procedura extendida che vegnan attribuids ad in chantun, survegnan – a partir da la data da l'attribuziun – ina legitimaziun da persunas estras che vegn emessa en il format da carta da credit e che vala 12 mais. Activitads da gudogn da requirentas e requirents d'asil dovran ina permissiun.

Sche la procedura d'asil è vegnida refusada cun vigur legala, scroda la permissiun da pratitgar in'activitad da gudogn suenter la scadenza dal termin da partenza fixà, e quai er sch'ina procedura extraordinaria da meds legals è vegnida introducida e sche l'execuziun da la spedida è vegnida suspendida. Sch'il SEM prolunghescha il termin da partenza en il rom da la procedura ordinaria, po vinavant vegnir permessa in'activitad da gudogn. Durant ina procedura tenor l'artitgel 111c na vegnan permessas naginas activitads da gudogn.


Cumpetenzas / proceder

Sche la requirenta u il requirent d'asil ademplescha las premissas fundamentalas per pratitgar in'activitad da gudogn, sto la patruna u il patrun far la dumonda correspundenta (dumonda B1) cun in contract da lavur legalmain valaivel via la controlla d'abitants a la vischnanca da domicil* da la requirenta u dal requirent d'asil. La vischnanca da domicil transmetta ils documents da dumonda a l'Uffizi da migraziun e da dretg civil dal Grischun, partiziun Asil e return, nua ch'ils documents vegnan examinads consultond l'autoritad dal martgà da lavur. Sch'i n'existan nagins motivs da refusa, vegn la permissiun da lavur emessa en furma d'ina copia da la permissiun u en furma d'ina disposiziun. Quella arriva via la controlla d'abitants a la requirenta u al requirent d'asil. La requirenta u il requirent d'asil dastga cumenzar la plazza pir, cura che la permissiun da lavur è avant maun.

*Sche la requirenta u il requirent d'asil mida ses lieu da domicil il mument ch'ella u el cumenza cun la lavur, sto la dumonda vegnir inoltrada a la vischnanca da domicil ch'è cumpetenta en il futur.