Project da pilot «Rinforzar las resursas da babs» vegn termin

Il project da pilot da 2 onns «Rinforzar las resursas da babs» da l'Uffizi da sanadad vegn terminà la fin dal 2023. La finamira dal project da pilot è stada quella da chattar ora, sch'igl exista en il chantun il giavisch per ina cussegliaziun cumplementara explicitamain per babs. La purschida da la cussegliaziun da babs sa drizzava a babs d'uffants da 0–5 onns. Dal settember 2022 fin il december 2023 ha signur Nicolas Zogg cumplettà la purschida da la cussegliaziun da geniturs sco um che cusseglia. El ha purschì la cussegliaziun da babs per incumbensa da l'Uffizi da sanadad.

La cussegliaziun da babs resta integrada en la cussegliaziun da geniturs

A partir da l'onn 2024 na porscha l'Uffizi da sanadad nagina purschida da cussegliaziun separada pli per babs. La finamira principala èsi da sviluppar la purschida existenta da la cussegliaziun da geniturs uschia vinavant, ch'ella vegn duvrada e ch'ella porscha a tut las persunas responsablas per l'educaziun in sustegn persistent.

Rinforzar la purschida existenta

Las enconuschientschas dal project da pilot mussan, ch'i fiss senz'auter giavischaivel d'integrar in cussegliader masculin en la cussegliaziun da geniturs. Il team da la Cussegliaziun da geniturs dal Grischun sa cumpona actualmain unicamain da cussegliadras.

Da pussibilitar a mammas e babs in access simpel ad in post da cussegliaziun ch'è neutral e nunbirocratic, è impurtant per la promoziun da la sanadad e per la prevenziun da la famiglia. La cussegliaziun da geniturs è ina purschida a favur da la famiglia per geniturs e per persunas responsablas per l'educaziun da poppins e d'uffants fin ch'els cumenzan la scolina ed in emprim post da consultaziun per dumondas da tuttas sorts en il sectur da la promoziun tempriva. La promoziun tempriva ha la finamira da pussibilitar ad uffants bunas cundiziuns per crescher si, quai davent da la naschientscha fin a l'entrada en il sistem da furmaziun formal (per regla cun 5 onns).

En connex cun ulteriuras dumondas per rollas, partenadi, cumpatibilitad da la famiglia cun la professiun, relaziun cun l'uffant, facturs da stress acuts sco er temas giuridics vegnan ils babs ed er las mammas repartids a posts spezialisads specifics.

Posts spezialisads pussaivels èn (nagina enumeraziun definitiva!):

• Adebar – Post spezialisà per sanadad sexuala
• Crusch blaua dal Grischun
• famur
• maenner.gr
• Agid a victimas dal Grischun
• Servetschs psichiatrics dal Grischun
• Pro Junior
  
• Accumpagnament pedagogic-social da famiglia

Sin www.find-help.gr.ch chattan ins purschidas da cussegliaziun e da sustegn.