Stabiliments da ladim natiral
Cun meds chantunals sustegna il chantun Grischun l'edifizi nov da stabiliments da ladim natiral e da curts libras cuvridas per projects pli pitschens, sche tals na pon betg vegnir sustegnids en il rom da mesiras per meglierar la structura. Il sustegn finanzial dals projects da construcziun gida a sanar ils manaschis agriculs e d'alpegiada pertutgant la protecziun da las auas.
Sut tge cundiziuns survegn ins contribuziuns chantunalas?
- La controlla da l'ermeticitad mussa ina mancanza.
- Il manaschi resp. l'alp ha il dretg da survegnir pajaments directs.
- L'investiziun sto vegnir utilisada durant ils proxims 5 onns.
- L'investiziun na po betg vegnir sustegnida tenor l'Ordinaziun davart las meglieraziuns da structura en l'agricultura (SVV; SR 913.1).
- Ina permissiun da construcziun cun vigur legala è avant maun.
- La finanziaziun è garantida.
- La contribuziun sto vegnir garantida avant il cumenzament da las lavurs.
- Ina dumonda correspundenta po vegnir fatga da la proprietaria resp. dal proprietari u da la cultivatura resp. dal cultivatur.
Co guarda ora il sustegn?
- Tariffas per construcziuns novas: per plattas da ladimer 50 francs/m³, cun tetg 80 francs/m³, per puschineras 80 francs/m³ e per curts libras cun cuvrida (betun, crappa da salaschada) 30 francs/m².
- Per sanar plattas da ladimer, puschineras u curts libras cuvridas existentas na vegnan pajadas naginas contribuziuns.
- Per mesiras che sustegnan stabiliments da ladim natiral cun contribuziuns chantunalas per mesiras ordinadas suenter la controlla da l'ermeticitad vegn la contribuziun pajada a partir da 4000 francs ed è limitada a maximalmain 10 000 francs per manaschi, per exempel platta da ladimer cun 80 m³, puschinera cun 50 m³ u curt libra cun 134 m².
Tge documents ston ins inoltrar?
- Dumonda cun formular
- Plans
- Program da spazi
- Finanziaziun
- Rendaquint da construcziun suenter la realisaziun cun dumonda da pajament