Deposits da puschina averts sin manaschis agriculs e d'alpegiada ston vegnir cuvrids fin l'onn 2030 (Ordinaziun davart la protecziun da l'aria, LRV; SR 814.318.142.1). La cuvrida da deposits da puschina effectuescha ina clera reducziun da las emissiuns d'amoniac e da substanzas odurusas. Cumpetent per realisar la mesira da la LRV è l'Uffizi per la natira e l'ambient (UNA). Fin la fin da l'onn 2025 paja il UAG contribuziuns a mesiras da construcziun per cuvrir ils deposits da puschina. 

Co sto guardar ora la cuvrida d'in deposit da puschina?

Las averturas ston esser minimalas e na dastgan en total betg surpassar 6 pertschient da tut la surfatscha dal deposit da puschina.

Il deposit da puschina sto vegnir emplenì sut il nivel da puschina. Per quest intent dovri in bischen sfunsabel ch'è segirà, per ch'el na possia betg sa distatgar nunspetgadamain.

Il fegl d'infurmaziun "Cuvrir deposits da puschina per reducir emissiuns" porscha ina buna survista sur da las pussaivladads da construcziun per cuvridas da deposits da puschina averts: Cuvrida da deposits da puschina.

Quant grond è il sustegn finanzial dal chantun per las mesiras da construcziun?

Fin da l'onn 2025 sustegna il UAG las mesiras da construcziun cun ina contribuziun da 60 francs/m² da la surfatscha da basa. Las contribuziuns per questa mesira èn limitadas a 10 000 francs per manaschi.

Tge premissas ston esser ademplidas per ina dumonda da contribuziun?

• Il manaschi resp. l'alp ha il dretg da survegnir pajaments directs. En cas d'affittaziun po er la proprietaria u il proprietari inoltrar la dumonda.
• Ina permissiun da construcziun cun vigur legala è avant maun.
• La contribuziun sto vegnir garantida dal UAG avant il cumenzament da las lavurs. L'investiziun na po betg vegnir sustegnida tenor l'Ordinaziun davart las meglieraziuns da structura en l'agricultura (SVV; SR 913.1). La finanziaziun sto esser garantida. L'investiziun sto vegnir utilisada durant ils proxims 5 onns.